Footer

Kapitan, kagawad ti barangay, napangtaan

SANTA CRUZ, Ilocos Sur – Kaariping ti pagrebbengan dagiti opisial ti barangay ti pannakapangta ti biagda.

Maysa a kapitan ti barangay ken kagawad ti napangtaan iti nagsina nga insidente a napasamak iti Santiago ken ditoy nga ili itay nabiit.

Napangtaan da Barangay Captain Isidro Vedania ti Barangay Pinipin ditoy ken ni Barangay Kagawad Warlito Rigor, 50, naasawaan ken agnaed iti sitio Alog, Dan-ar, Santiago, Ilocos Sur.

Segun iti kapitan ti Pinipin, mangiyuli iti darum a direct assault upon a person of authority maikontra kada Rosendo Cabalbag, Lodivico Javonitalla, Jessie Javonitalla ken Arnold Javonitalla, kabarangayanna met laeng, gapu iti panangkariarda kenkuana ken panangbugbogda iti barona.

Segun iti kapitan, matmaturogen idi nagreport ti maysa a kabarangayanna mainaig iti riribuk iti periaan iti barangayda. Nagresponde ti kapitan ket nakitana dagiti masuspetsa a mapapati a nabartek ken manggulgulo. Kadua ti kapitan ti asawana ken dagiti barangay tanod a nangpakalma kadagitoy.

Ngem idi agawiddan, impukkaw dagiti suspetsa nga “uray kapitanka, saankami a mabuteng kenka”, a kasaruno ti panangbato kenkuana ni Jessie Javonitalla. Nupay kasta, nakalisi ti kapitan.

Naganawa ti anakda ngem daytoy metten ti kinabil dagiti suspetsa.

Kabayatanna, nagpulong ni Rigor iti polis gapu iti pannakaawatna iti pangta ti biagna.

Innaganan ti kagawad dagiti nangpangta kenkuana a da Anthony Rigor ken Reynante Bongolan.

Segun iti kagawad, masansan a pangtaan dagitoy a kaarubana iti barangay.

Kinuna ti kagawad nga itay nabiit, impukpukkaw dagiti suspetsa a rummuar iti balayda ngem nagtalinaed iti uneg iti amakna mangan no dangran dagitoy.

Saan a nadakamat no ania ti puon ti nangpangtaan dagiti kalugaranna a suspetsa iti kagawad.

Comments are closed.