Footer

Security guard, simmipat

VIGAN CITY – Uray panangtaldiap iti maysa a tao, pakairubuan payen.

Gapu laeng iti mapapati a panangipababa-panangipangato ti biktima a panangkitana iti suspetsa, sinipaten ti naud-udi.

Nasipat iti namindua ti barukong ni Allan Molina, 24, residente iti Tamag ditoy babaen ken ni Joseph Padilla, baro, security guard ti maysa a pagsaldaan ditoy, ken agnaed iti Barangay Rugsuanan ditoy met laeng a siudad.

Segun iti report, dimmagas ni Molina iti maysa a tienda iti asideg ti Partas Transportation tapno gumatang iti sigarilio ngem idi masabatna ti security guard a mapapati a nakainom, sinipat metten daytoy.

Iti panagpatang dagiti dua iti polis station, inkalintegan ti security guard a nasipatna ni Molina gapu iti panangipababa-panangipangato ti biktima a nangmatmat kenkuana, banag a naglibakan ti biktima.

Nagkinnaawatan met laeng dagiti dua kalpasana nagpadispensar ni Padilla.