Footer

Awan pay naaresto a suspetsa iti Abaya ambush

STA. CRUZ, Ilocos Sur – Naitabon ti kapitan ti barangay Lantag ditoy dua a lawas kalpasan ti pannakatambangna idinto nga awan pay ti inaresto dagiti polis a  nangisayangkat iti krimen.

Naitabon ni Kapitan Robert Abaya ti Camangaan kalpasan ti pannakaimisana ken neocrological services iti San Jose Church a tinabunuan dagiti padana a dadaulo ti barangay ditoy.

Pinaltogan dagiti di pay nabigbig a tattao a naglugan iti motorsiklo ni Abaya bayat ti panagdaliasat ti naglugananna iti barangay road ti Lantag ditoy iti alas dos ti malem ti Nob. 13.

Nagsagrap ti kapitan kadagiti sugat iti nadumaduma a paset ti bagina a nakatayanna a sigida. Nasugatan met iti stray bullet ni Antonio Fabro, Jr.

Saan a naan-ano ti drayber ti dyipni, ni Remigio Pascua, ken dua pay a sabali a nakalugan.

Nakarekobre dagiti inbestigador iti 28 a kapsula manipud iti M-16 ken cal. 45 iti nakapasamakan ti krimen.

Di pay ammo no ania ti motibo ti pammapatay.

Makabulan sakbayna, nagpukaw ni Barangay Captain ti Tablac, Candon City Laureano Galicia ket agingga iti agdama di pay simmangpet iti pagtaenganda.

Ngem iti interbiona iti radio, nadakamat ti kapitan nga adda naawatna a death threat.

Tallo pay a barangay captain ken maysa a bokal ti mapapati a nakaawat met iti nangisit a ribbon.

Comments are closed.