Footer

Dagiti biangot a negosiante

Biangot a talaga dagiti negosiante iti Estados Unidos. Pati panangsalaknib dagiti ahensia ti gobiernotayo iti panagtagilako ditoy pagilian ket pakibianganda.

Saan pay a naipakat ti nabaliwan nga implementing rules and regulations (IRR) ti Executive Order No. 51 wenno ti Milk Code, addan isusupringda.

Sagudayen ngamin ti EO No. 51 a malimitaran ti pannakailako dagiti infant formulas ken kasapulan dagiti kompania a mangikabil iti label kadagiti produktoda a mangballaag iti posible a pannakaisagmak ti salun-at dagiti agaramat.

Dagus a nangipatulod ti Chamber of Commerce of the United States of America babaen ken ni Thomas Donahue, presidente ken chief executive officer iti surat ken ni Pres. Arroyo a nangipeksaanda iti pannakaburiborda iti daytoy a gannuat ti gobierno agsipud ta makaapekto daytoy iti industria ti parmasiutika ken mamagresulta iti negatibo a panagtalek dagiti agipupuonan.

Nangruna a binabalaw daytoy biangot nga opisial ti sinaguday ti IRR ti EO No. 51 a mangiparit iti pannakailako dagiti infant formula kadagiti ubbing nga agtawen agingga iti tallo a maikontra (kano) iti Milk Code ken ti World Health Organization’s International code of Marketing of Breast Milk Substitutes.

No patien ni Donahue, ibilang ti IRR ti infant formula kas “potensial a pakaisagmakan ti salun-at” agsipud ta maibilin ti pannakaikabil ti warning labels nga awan ti sientipiko a pagsanggiran daytoy.

Imballaag pay ni Donahue nga iti daytoy nga addang ti gobierno, agngatangata dagiti negosio iti kalinteganda nga agipuonan iti Pilipinas.

Uray ania a pangsirigan iti surat, maysa daytoy a blackmail ti Chamber of Commerce of the USA. Kas kapaliiwan, agsobsobra dagiti anunsio kadagiti periodiko ken telebision a mangipakpakdaar kadagiti “napintas ken makapasayaat” a pagbalinan ken salun-at dagiti infant formulas iti baet a dagitoy a produkto ket awanan iti pundasion mainaig kadagiti sientipiko a pammaneknek ken panagadal.

Mainayon ditoy ti naduktalan ti United Nations’ Food and Agriculture Organization (FAO) ken ti World Health Ortganization nga adda dagiti powdered infant formula a naakaran iti Enterobacter Sakasakii ken salmonella a pakaigapuan iti sakit ken inpeksion.

Madakamat ditoy a patauden ti E. sakasakii ti neotal sepsis, meningitis ken dadduma pay a sakit idinto a maysa a bakteria ti Salmonella a mangpataud iti sabidong iti taraon, typhoid ken paratyphoid fever.

Agdadata a bukod nga interes ti nangiduron iti daytoy a bunggoy ti negosio tapno sumupringda. Dakkel a pakaapektuan dagiti produkto manipud iti US nga infant formula ta bumassit la ketdi ti paglakuanda ditoy pagilian.

Ngem kadakami, nasamsamay pay nga iduron ti DOH ti panagpasuso. Daytoy pay la ti kasayaatan a pangtaraon iti ubing agsipud ta adda dagiti ramenna a di mabirokan kadagiti infant formula a mangipaay iti nasalsalun-at, ken natibtibker a pangkontra kadagiti sakit.