Footer

Di rumbeng a maitantan ti eleksion – Chavit

VIGAN CITY – Imbatad ni Gob. Luis “Chavit” Singson a di rumbeng a maitantan ti naituding nga eleksion inton Mayo 14, 2007.

Imbaskag ni Singson daytoy a kapanunotanna kabayatan ti pannakiuman-uman kenkuana ti media iti mismo a pagtaenganna iti Baluarte ditoy itay lawasna.

“Saan a rumbeng ti pannakaisanud ti eleksion agsipud ta intuyangen ti linteg ti pannakaangayna. Imbagakon idi damo a saanak a pabor iti parliamentaria a porma ti gobierno,” panangilawlawag ti langilangan a gobernador.

Inkalintegan pay ni Singson a nasaysayaat met laeng no maituloy a di ket maitantan ti eleksion a naiyeskediul inton Mayo 14, 2007.

“No maangay ti eleksion, maaddaan dagiti tattao iti gundaway a mangpili kadagiti kayatda nga agbalin a lider wenno opisial iti gobierno lokal ken nasional. Ngem no maisanud ti eleksion sa ket maipakat ti pannakabalbaliw ti porma ken sistema ti gobierno babaen ti Cha-Cha, mapukaw ti karbengan dagiti umili nga agpili iti kayatda nga agpangulo,” kinuna pay ti gobernador.

Inlawlawag pay ni Singson a dina supiaten ti pannakaamendar ti konstitusion ngem kaykayatna nga agtalinaed a presidensial ti porma idinto a pederal ti sistema imbes a parliamentaria ken unitary system ti maipakat.

“Iti parliamentaria a porma ti gobierno mapukaw ti karbengan dagiti tattao a mangpili iti kayatda nga agbalin a pangulo ta dagitinto lattan mabutosan a kameng ti Parliamento ti agpili iti kayatda nga agpangulo,” innayon pay ti beterano a politiko.

Mangipaneknek pay nga adda naan-anay a demokrasia no adda maangay nga eleksion, segun pay laeng iti ama ti probinsia.