Footer

Lakay, nahold-ap iti pagtaenganna

CANDON CITY – Maysa a lakay ti nahold-ap iti nasapa a bigat iti uneg ti pagtaenganna itay nabiit.

Hinold-ap dagiti di pay nabigbig a suspek ni Trovador Mati, 81, agnaed iti San Isidro, Candon City, iti agarup alas 6 ti bigat ket intarayda ti kuartana ken ti kotsena.

Naammuan iti imbestigasion ti polis a linuktan ti biktima ti ridaw ti balayna gapu iti panagtuktok dagiti dua a suspek ngem dita metten a pinaturonganda iti paltog sada imbaga iti hold-ap.

Pinadas ti biktima nga agawen ti cal. 45 a paltog dagiti suspek a puon ti pimmutokanna. Ginuyod dagiti suspek ti biktima iti uneg iti kuarto, sada siniglotan ti saka ken imana ken binedbedan ti bibigna.

Kinasakas dagiti suspek ti P4,000 a linaon ti petaka ti suspek sada intaray ti kotsena a Toyota Altis.

Natakuatan laengen panagtakaw idi sumrek ti babaonen ket nakitana a nakatali ti lakay.