Footer

Prutas iti Pilipinas, mailakon iti China – Sek. Yap

Dagiti prutas a pataud iti Pilipinas ket natarusen a mailako idiay China.

Inwaragawag daytoy ni Agriculture Secretary Arthur Yap kabayatan ti taripnong dagiti nadumaduma a food manufacturing and Processing plants ditoy pagilian a naangay iti Mandarin Hotel itay lawasna.

Kinuna pay ni Yap iti mensahena a babaen ti pannakaipakat dagiti safety measures a panangkilatis kadagiti produkto a maibiahe kadagiti sabsabali a pagilian, napasingkedan a dagiti aggapu iti Pilipinas ket awan ti problema iti shipment para kadagiti prutas a maiyeksport kadagiti sabsabali a pagilian nangruna iti China.

Kanaig daytoy, inggunamgunam ni Yap ti panangpataud iti ad-adu ken mas de kalidad a prutas nga iyeksport idiay China.

Iti kallabes, saan unay a maakomodar dagiti prutas nga aggapu iti Pilipinas.

Ngem iti daytoy a panagsubli ni Yap kas sekretario ti agrikultura, naikkan ti business enterprise liberalization wenno nawaywaya a pannakaipalu-bos iti produkto nga aggapu iti maysa a pagilian ken maipan iti ballasiw-taaw.

Pinasingkedan pay ni Yap nga ad-adu a business venture ti maipakat iti nagbaetan ti Philippines ken China kadagiti agri-business products.

Inggunamgunam ni Yap iti panagpataud ti ad-adu pay a de kalidad a prutas ditoy pagilian.

Sakbay ti panagsublina iti departamento iti agrikultura, ni Yap ti dinutokan ni Pres. Arroyo a pointman iti pannakaipakat dagiti programa ti gobierno iti North Quad.

Comments are closed.