Footer

Sentenario ti Sakada, narambakan iti Candon

CANDON CITY – Kas panangbigbig kadagiti umuna a sangapulo ket lima a Sakada a kaadduanna ti taga-Candon a napan nagtrabaho iti kaunasan iti Hawaii, rinambakan ti siudad ditoy ti Sakada Centennial itay December 1.

Mismo nga indauluan ni Congressman Eric Singson, City Mayor Allen Singson, ken dagiti konsehal iti siudad ti nasao a parambak a tinabunuan dagiti agtuturay a pakairamanan da DepEd Secretary Jesli Lapus ken ni Philippine Consul to Hawaii Abadilla ken pannakapadayaw dagiti appo ken kakabagian dagiti 15 a sakada iti siudad ditoy.

Maipalagip a nagluas idi Nobiembre 1906 ti umuna a bunggoy dagiti Ilokano a kaadduanna ti taga-Candon a naglugan iti SS Doric ket simmangladda iti Honolulu Harbor idi Disiembre 20, 1906 sada naipan iti Ola’a Sugar Plantation nga immuna a nakaipakatanda iti trabaho iti kaunasan.

Karaman iti bunggoy dagiti agkabsat a Mariano ken Celestino Cortez, ni Simplicio Gironella ken dagiti annakna a da Mariano, Vicente, Francisco, ken Antonio, ken dagiti agkabsat a Prudencio ken Cecilio Sagun, agpapada a taga- Candon.

Kaduada iti grupo da Julian Galman, Martin de Jesus, Apolonio Ramos, Marcelino Bello, Filomeno Rebollido ken Emiliano Dasalla.
Tapno maipaay kadakuada ti pammigbig, binirok ti research committee nga indauluan ni City Councilor Julio Acance dagiti nadakamat a sakada. Nupay kasta, sumagmamano laeng nga appo ti tumeng ti nasarakan ti komite a pakaibilangan ti kaputotan dagiti agama a Gironella, dagiti agkabsat a Sagun, ni Mariano Cortez, ken ni Filomeno Rebollido.

Dagitoy a kaputotan ti pinadayawan ti siudad bayat ti parambak.

Tampok pay ti Centennial Celebration ti pannakaikkat iti abbong ti rebulto ti Sakada iti plasa ti siudad ken ti panakaidispley iti publiko dagiti nadumaduma nga alikamen nga insangpetda kas koma iti baul, ikamen, ramit dagiti karpintero, ken ladawan ken pakasaritaan dagiti sakada.

Binigbig dagiti opisial ti siudad ti akem dagiti sakada ti Candon iti pannakaraat iti dalan dagiti simmarsaruno a kaputotan a napan nagtrabaho iti iti kaunasan ti Hawaii.

Comments are closed.