Footer

2 rebelde a gerilia a kameng ti KLG De Lara Group, simmuko

SAN FERNANDO CITY – Kinuna ni PNP Regional Director Police Chief Supt. Leopoldo Bataoil a silulukat ti PNP a mangawat kadagiti rebelde a gerilia nga agsubli iti ikub ti gobierno idinto a dinayawna ti isusuko itay nabiit ti dua a mapapati a kameng ti local communist terrorist (LCT) group.

Kinuna ni PNP Regional Director Police Chief Sup.t Leopoldo Bataoil nga apresiarenna ti pannakalawlawag ti panunot dagiti dua a nagtungpal iti ibababada iti kabanbantayan.

Nagsaruno a simmuko iti polis da Rodrigo Ambatang Bistikin, 40, am-ammo pay iti aliasna a Ruby, Raul, ken Ruksan, residente iti Barangay Nagtablaan Sta. Lucia, Ilocos Sur,  ken ni  Jose Alendayao Bennagen, 38, mabigbig pay iti aliasna a Gener, Jessie ken Jeric, residente iti Kimmarin, Salcedo, Ilocos Sur.

Kinuna ni Bataoil a da Bistikin and Bennagen ti maika-14 ken 15 a kameng ti KLG De Lara a simmuko iti daytoy a tawen.

Simmuko ni Bistikin idi Nobiembre 26 babaen ti koordinasion da Sta. Lucia Mayor Ferdinand Hernaez, ti 50th IB ti Philippine Army, Regional Mobile Group I, Regional Intelligence Investigation of PRO, Intel Branch of ISPPO ken ti 300th AISG, PAF.

Itay Disiembre 4, simmuko met ni Bennagen ken ni P/Insp. Melecio Anneb ti Candon City police station iti pagtaengan daytoy iti Camp Dangwa, La Trinidad, Benguet.

Nakalista ni Bistikin a kas No. 8 iti Order of Battle iti babaen ti KLG de Lara group nga agdakdakiwas iti maikadua a distrito ti Ilocos Sur idinto a nakalista ni Bennagen a No. 31 iti Order of Battle  iti nasao met laeng a grupo para iti 3rd quarter.

“Nataltalged ti agbiag nga adda iti salinong ti gobierno ngem ti agdakdakiwas iti kabanbantayan nga an-anupen dagiti armada. Ngarud, kadagiti saan pay a simmuko, silulukat ti gobierno a mangawat kadakayo ken nakasagana ti pulisia a mangprotektar kadakayo,” kinuna ni Bataoil.

Innayon ni Bataoil nga inrusatna ti “Bring Home a Comrade Project” a mangted iti gundaway ken proteksion kadagiti rebelde nga agpangpanggep a sumuko.