Footer

Ayat ti iruknoytayo, saan a riribuk

PASKUAN. Iti daytoy nga aldaw, rumbeng nga agrambak amin a Kristiano gapu iti pannakaiyanak ti Ari ti Kappia. Iti isasangbayna, rumbeng laeng nga agtalimudok ti natalingenngen a kappia, awan panaginkukuna a panagiinnayat ken nadarisay a panagpipinnateg dagiti amin a parsua ditoy rabaw ti daga.

Ngem no taliawentayo dagiti mapaspasamak iti agdama iti sangalubongan, kasungani dagiti maimatangan ken mapaliiwtayo.

Iti Iraq ken Afghanistan, agtultuloy ti riribuk iti baet ti kaadda dagiti puersa ti United Nations a mangtimon iti urnos ken talna. Kastoy met la ti mapaspasamak kadagiti sabsabali a pagilian; dagiti agkakailian ti agsisinnida gapu iti panagsusupadi iti ideolohia ken pagtaktakderan iti biag ken politika.

Iti pay mismo nga Israel a napateg ti pakasaritaanna iti Katoliko a lubong, ganggannaet pay laeng ti kappia gapu iti dida panagkakatunosan kadagiti kaparangetna a nasion a mangibilbilang iti Israel nga squatter iti nangipasdekanna iti teritoriona.

Iti Estados Unidos, sanguen ni Pres. George Bush ti Kongreso a pagmayoriaan ti kasupangetna iti partido ken nainget a kritiko iti pannakaisawsaw ti US iti gubat iti Iraq a puon ti nakaibuisan iti rinibu a soldado nga Amerikano.

Iti baet dagiti nainget nga addang nga inwayat dagiti nadumaduma a pagilian kalpasan ti pannakabomba ti World Trade Center ti New York nga insayangkat ti Al Qaida, adda latta pangta ti terorismo, kasla espada a nakabitin iti ulonan dagiti tattao a managayat iti kappia.

Ditoy pagiliantayo, agtultuloy dagiti enkuentro iti nagbaetan ti New Peoples’ Army wenno ti Mindanao Independence Liberation Forces maikontra iti puersa ti gobierno iti baet ti all-out war nga inwayat ti militar ken kapolisan kas imbilin ti commander-in-chief.

Agsasaruno ti pannakaiwalang dagiti kameng ti militante a grupo ken dagiti kameng ti media, nangruna dagiti napinget a kritiko ti korapsion, panagabuso ken pannakarugos iti kalintegan dagiti tattao.

Agtultuloy met ti saan a panagkikinnaawatan dagiti agtuturaytayo, gapu iti maipagpagna a pannakabalbaliw ti konstitusion babaen ti nadiskarada a peoples’ initiative ken bangking a constituent assembly. Bangking kunatayo ta saanen nga ikabkabilanan ti Kamara ti Senado iti panangidurudorna iti charter change. Ita pay laeng, mairubrubbuaten dagiti protesta gapu iti agdadata a kinapuskolen ti rupa dagitoy a politiko a mangbalballaibo kadagiti tattao tapno laeng makallawitda ti nalimed ken managimbubukod a panggepda ken interes.

Ngem ngimmernger dagiti umili ken dagiti nadumaduma a sektor kas kadagiti militante a grupo, simbaan, ken dagiti mangmangged ket nagsanud dagitoy. Ita kayatda metten ti constitutional convention.

Ngem kayattayo man ken saan, nalukaisan ti kinapudno a nabingbingay dagiti umili ken di natalingenngen ti kasasaad iti politika a mangiluges la ketdi kadagiti ganansia iti ekonomia a nagun-od iti daytoy a tawen.

Ket masaludsottayo: daytoy kadi ti isarabotayo iti Mesias? Imbes nga ayat, urnos ken talna, iruknoytayo ketdi ti guranggura, apas, di panagkikinnaawatan, kinamanagimbubukod ken kinabuklis.

AYAT ken KAPPIA ti kaipapanan ti Paskua. Ngem nakaladladingit ta saanen a daytoy ti agubbog iti pusotayo iti daytoy a pannakaipasngay ti Mesias.