Footer

Ti krismas tri

Ania ti kaipapanan ti krismas tri? Kasano a timmaud daytoy?

Simbolo ti Kristianismo ti krismas tri, lalo dagiti Katoliko ken aminen a sekta a mamati a buklen ti Tallo a Persona ti Dios: Dios Ama, Dios-Anak ken Dios-Espiritu Santo.

No ibisualtayo ti uha ti krismas tri, nagsinantrayanggulo nga isu ti simbolo ti Holy Trinity wenno ti Dios a binukel ti Tallo a Persona. Ti Dios Ama iti kuntirad, ti Dios-Anak iti makannawan ken Dios Espiritu Santo iti makannigid.

Idi maika-7 a siglo, napan sadiay Germany ni San Bonifacio, maysa a mongha manipud iti Credition, Devonshire tapno isaknapna ti Kristianismo. Inaramatna ti Fig tree a kas simbolo ti Holy Trinity. Naawagan ngarud a Kayo ti Dios ti Fig tree. Ket no dumteng ti Paskua, adda daytoy a kayo iti tunggal balay a kas panangipaneknekda iti panangarakupda iti Kristianismo.

Nagnaed ti mongha iti Thurigia ket iti di nagbayag, napanaganan dayta a lugar iti Cradle of Christmas Decoration Industry. Nakanonisaran ni San Bonifacio a kas santo.

Idi maika-15 a siglo, saan laengen a simbolo ti Nasantuan a Trinidad ti krismas tree no di pay naikkan ti fig tree iti kandela ken bitbituen a rumimatrimatda iti kasipngetan. Dayta a panagrimat dagiti bituen ket isu met laeng ti panagrimat ti Holy Trinity iti biag ti tao lalo no adda daytoy iti “kasipngetan”, mangipasimudaag a sidadaan a mangappupo kadagiti naiyaw-awan.

Isu a no mangikabiltayo iti krismas tri iti uneg ti balaytayo, saantayo koma lattan nga idekorar daytoy, ta saan met a dekorasion ti Tallo a Persona iti biag ti tao no di daytoy ti sentro ti biagtayo.

Uray ni Martin Luther, ti pundador ti Lutheran Church, inarkosanna iti kankandela ti maysa a bassit a fig tree tapno maiparangna kadagiti ubbing no kasano ti panangrimat dagiti bituen iti kasipngetan. Napasamak daytoy idi 1510. Kadagiti simmaruno pay a panawen, naipakadawyanen ti panagaramat iti krismas tri a kas simbolo ti pammati ken panangilagip iti yaay ti Dios Anak ditoy daga.

Dagiti met laeng Germans ti nangiyam-ammo iti krismas tri sadiay England idi maika-17 a siglo ngem saan unay a naglatak. Idi laeng katengngaan ti maika-18 a naglatak babaen ken ni Reyna Victoria ken nalabit nga impluensia ni Prince Albert a taga Alemania. Manipud idin, saan laengen a kandela ti naidekorar no di pay pigurin dagiti anghel, nagduduma a bitinbitin, Christmas card, nagduduma ti marisna a bombilia nga agtokar pay.

Indanon dagiti taga-England ti krismas tri a kas tagilako sadiay USA. Dayta ti nanipudan ti krismas tri dita a lugar. Ketdi, ti sarukod a kendi ti simbolo ti krismas iti USA.

Naiyam-ammo ti krismas tri ditoy pagilian babaen dagiti misionero a taga-lumaud ken dagiti Amerikano.

Ngem maymaysa laeng ti kaipapanan ti krismas tri: panangipasagepsep kadagiti tattao iti kinaadda ti Dios iti Tallo a Persona. Iti panawen ti paskua, saan laeng a panangipalagip iti pannakaipasngay ni Jesucristo a Mannubbot no di pay mapabaro ken maipasngay manen iti tunggal puso ti nabilbileg ken natibtibker a pammati. Isuro koma kadagiti annak ti pudno a kaipapanan ti krismas tri.

Comments are closed.