Footer

Adda bingay amin a barangay

BURGOS, Ilocos Sur – Tapno awan ti malablabsan ken awan ti agim-imon, adda amin bingay dagiti barangay ditoy nga ili manipud iti municipal share ti R.A. 7171,  daytoy ti impakaammo ni Mayor Nathaniel Escobar itay nabiit.

Kinuna ni Escobar nga itay nabiit, simmangpet ti nasurok P5 million a pundo manipud iti bingay ti munisipio iti  R.A. 7171  ket nailatang ti kagudua ti pundo kadagiti 25 a barangay ditoy wenno iti dagup a P2.5 million.

“Agpapada a mailatangan dagiti amin a barangay ditoy ayanmi iti sag-P100,000,” kinuna ni Escorbar.

Kinuna ti mayor a maibusbos ti pundo kadagiti priority projects dagiti barangay.

“Awan ti politikana daytoy, nakadduak man wenno saan iti napalabas nga eleksion ket adda amin bingayna iti R.A. 7171,” kinuna ni Escobar.

Kabayatanna, kinuna ti mayor a malaksid iti bingay ti munisipio iti R.A. 7171, adda  nakurang a P2-million  counterpart a pundo nga inlatang ni Congressman Eric Singson para iti Burgos.

Innayon ti mayor nga inlatangda daytoy para iti irigasion.

Agtultuloy daytoy a proyekto ti ilida ta makitana ngamin a daytoy ti maysa kadagiti kangrunaan a makatulong kadagiti mannalon, impatalged ni Escobar.