Footer

Ballaag kadagiti agilinlinteg

IMPARIKNAN dagiti lider ti Simbaan Katoliko iti pannakapunnoda iti saan a pannakaitaltalek ti pannakarisut dagiti kontrobersial nga isyo babaen ti panangiwayatda iti prayer rally iti Rizal Park iti Manila itay Okt. 17.

Madakamat ditoy ti kontrobersia a pinarnuay ti Hello Garci tapes, ti anomalia ti P728-milion a pundo ti ganagan a mapapati a naited kadagiti politiko imbes a dagiti mannalon idi eleksion, ti pannakaikabit dagiti sumagmamano a nangato nga opisial ti militar iti panagsuitik iti eleksion nga agingga ita ket awan pay ti naglawaganda ken iti kaudian ti panangiduron ti administrasion ken dagiti kaaliadona ti pannakabalbaliw iti konstitusion uray di maikanatad ken saan a maiyannurot iti linteg ti pannakagun-odna.

Ninamnama dagiti umili ken dagiti lider ti relihion nga iti panangibasura ti Korte Suprema iti petision ti Sigaw ng Bayan ken ti ULAP a pannakabalbaliw ti konstitusion babaen ti peoples’ initiative gapu iti “nakaro a panangallilaw” kadagiti tattao, agulimeken dagiti lider ti pro-cha-cha.

Ngem insaruno ketdin dagiti lider iti Kamara ti pannakabalbaliw ti konstitusion babaen ti constituent assembly (con-ass).

Pinatnaganda pay ti nagtrabaho, binaliwanda dagiti paglintegan tapno isuda lattan ti manggamulo iti pannakabalbaliw ti konstitusion para iti nasayud a panagbalin a unicameral a parliamento ti gobierno a saanen a maibilang pay ti Senado.

Kas lawin iti banniit, maiyalud-od ti panagtakem dagiti elected officials iti 5 a bulan ta maitantan ti eleksion agingga iti Nobiembre a pannakaangay ti eleksion dagiti agbalin a kameng ti parliamentaria.

Akuen man wenno saan dagiti agilinlinteg, isuda a nakatugaw ti kangrunaan a benepisario iti mabukel a parliamentaro. Ngem no agsaritada, pagsayaatan ti pagilian daytoy nga irusrusatda. Pagbalinenda dagiti tattao a munneng ken nalaka nga iyalis ti alipusposda.

Ket ditoy nga impakdaar dagiti lider ti Simbaan Katoliko, dagiti dadaulo dagiti nadumaduma a pammati, dagiti militante a grupo, oposision ken dagiti nadumaduma a sektor ti panangiwayatda iti protesta gapu iti kinaawan delikadesa ken garapal unayen nga aramid dagiti agilinlinteg iti Kamara.

“Saan nga agbalin lattan a bulsek, tuleng ken umel ti Simbaan iti panagsagaba nga itden dagitoy nga isyo,” imbatad ni Catholic Bishop Conference of the Philippines secretary general Msgr. Juanito Figura.

Makita ngata ti Malakaniang a delikado ti mapasamak isu nga inidiannan ti panagbiahe ti tren ti charter change. Uray ni House Speaker Jose de Venecia, impakdaarnan nga iwalinda pay laeng ti planoda a mangiduron iti charter change babaen ti constituent assembly.

Ngem umdas kadin dagitoy?

Kasapulan a nakasiput latta dagiti tattao agsipud ta iti baet nga inwalin pay laeng dagiti agilinlinteg ti panggepda a mangbalbaliw iti konstitusion, saan a mainsasaan nga addanto gundaway nga iduronda manen ti planoda iti tiempo a sabali ti nakaituonan ti mata dagiti umili. Saan a nalaka nga ibbatan ti Kamara daytoy a gannuat a mangitag-ay dagiti tarigagay ken arapaap dagiti sumagmamano a mangituray iti pagilian.

Kanunonganmi ti inyussuat ti Simbaan. Kasapulanna nga aramatenna ti moral ken espiritual a lideratona tapno saan nga agballigi dagiti politiko nga addaan iti nangisit a panggep ken bukod nga interes. Kas nakunamin, agbalbaliw pay nga umuna dagiti agtuturay santo iyaplag ti panagbalbaliw ti konstitusion. Agingga nga isuda ti agtuturay, iti gungugong ti pagturongan ti pagilian.