Footer

Kolehio iti upland municipality, tarigagay ni Sagay a mapaadda

LIDLIDDA, Ilocos Sur – Linagidaw ni Mayor Jesus Sagay ti kaawan ti pagadalan iti lugarda pagbasaan dagiti annakda a saandan a bumaba pay.

Kinuna ni Sagay nga adu dagiti mamasirib nga ubbing iti lugarda ngem saanda a naikkan iti gundaway a makaturpos agsipud iti kaawan ti pagadalan iti upland municipality.

“Arapaapmi a makaadal ken makaturpos iti kurso dagiti amin a taga-Lidlidda,” kinuna ni Sagay.

Kinuna ni Sagay a  nakatulong kadakuada ti University of Northern Philippines iti Vigan City babaen ken ni Dr. Lauro Tacbas, agdama a presidente ti UNP.

Kinunana nga addan nagsaritaanda iti pannakaipasdek ti College of Technology a mangidiaya iti kurso a Bachelor of Science in Industrial Technology nga agbalin a maysa nga extension program ti nasao nga unibersidad.

“Babaen iti daytoy a kurso, maaddaan iti gundaway dagiti mamasirib ngem marigrigat nga agtutubo.  Makatulong pay daytoy a kurso iti panangsalaknibmi iti aglawlaw,”  kinuna ti mayor.

Masansan a mabisbisita ti Lidlidda gapu kadagiti nadumaduma a programana, nangruna iti pannakasalaknib ti kabanbantayan ti daytoy a lugar.

Comments are closed.