Footer

PGMA: National Press Congress Month maobserba iti Disiembre tunggal tawen

MANGRUGI ita a Disiembre ken kadagiti sumarsaruno a tawen, maselebraran ti National Press Congress Month ken ti Month of the Community Press in the Service of the Nation.

Daytoy ti deklarasion a linaon iti Presidential Proclamation No. 1187 a pinirmaan ni Pres. Macapagal-Arroyo itay Disiembre 7, 2006.

Kanaig daytoy, inangay ti Publishers Association of the Philippines, Inc. (PAPI) babaen ti panangidaulo ni Juan P. Dayang, presidente, ti 11th National Press Congress iti Tagbilaran City, Bohol itay Disiembre 16-20.

Kinuna ni Arroyo a “kasapulan nga ipaayan iti atension ti napateg nga annongen ti PAPI iti pannakataginayon iti wayawaya ti prensa ken iti dignidad iti propesion ti panagiwarnak ken panagipublikar.”

Dinakamat ti Presidente ti dedikasion ti organisasion iti promosion ken pannalaknib iti wayawaya ti prensa iti nangato nga ideal ti panagiwarnak kas serbisio publiko, nangruna kadagiti adda iti probinsia.

Kinuna pay ni Arroyo a “maragsakan unay iti pannakakitana nga itanggaya payen ti PAPI manipud iti orihinal a missionna ti natibker ken serioso a panangidur-as iti countryside development babaen ti espesial a panangited atension iti pannakaitudo dagiti oportunidad iti panagnegosio kadagiti rehion.”

Karaman kadagiti aktibidad iti National Press Congress ti colloquium iti biag ken gapuanan ni Graciano Lopez Jaena, ti maikadua a national summit iti media ken kultura iti countryside, roundtable forum iti media ken turismo, simposio iti oportunidad iti negosio ken plenario kadagiti agdama a napateg nga isyo.

Tampok ti press congress iti travel tour dagiti partisipante kadagiti beauty spots ti Bohol a pakairamanan ti Chocolate Hills, ti 3,000 ektaria a man-made forest, dagiti antigo a pasdek, dagiti beach resorts, ken iti river cruise a nakaandingayan dagiti agiwarwarnak kadagiti kankanta ken nabaknang a pangaldaw a nagtunged iti ayuyang dagiti Tarsier, maysa a kita ti primate, a masarakan iti sumagmamano laeng a pagilian iti Asia a pakairamanan ti Pilipinas.

Aganay a 200 a publishers, editors, broadcasters, reporters ken dadduma pay a media practitioners ken communicators manipud kadagiti nadumaduma a paset ti pagilian ti dimmar-ay iti nasao a pagteng, maibilang a kadakkelan a tinawen a panagtitipon dagiti journalists iti pagilian.

Ti Tawid News Magasin ti kakaisuna a pagiwarnak iti Ilocos Sur a timmabuno iti nasao a press congress.

Comments are closed.