Footer

Kaano a sumangbay ti kappia?

KANGRUNAAN a bugas ti mensahe ni Pope Benedict XVI itay Paskua ti pannakasapul iti maysa a mangisalakan para iti pannakarisut koman ti gubat kadagiti nadumaduma a pagilian ditoy lubong.

Iti bukod a panangamiris ti Papa, ad-adda a kasapulan iti daytoy a narikut a panawen ti maysa a mangisalakan agsipud iti “naipanurok a ballaag iti personal ken moral nga integridad.”

Inggunamgunam ti Papa nga iti daytoy a panawen a nakadanon payen ti tao iti bulan ken iti Mars, ken nakasaganan a mangparukma iti Lubong, kasapulanna pay laeng iti mangisalakan.

Kinuna ni Papa Benedict XVI nga idinto nga agparparang nga agtalek ti tao iti maikaduapulo ket maysa a siglo iti bagina ken makatakder nga amo iti bukodna a kaikarian, agtultuloy dagiti adu a matmatay iti bisin ken waw, sakit ken kinapanglaw iti daytoy a tawen ti kinaburnok ken nakawaywaya a komersialismo.

Imbatadna nga iti baet a maidirdir-i ti progreso, solidaridad ken kappia para iti amin, adu dagiti tattao a maad-adipen ken maab-abuso, nagsagaba iti diskriminasion wenno biktima iti gura ti puli ken relihion, terorismo ken dadduma pay a kinadamsak.

Linagidaw ni Papa Benedict XVI nga iti baet ti adu a panagdur-as ti humanidad, saan a nagbaliw ti tao: naipit ti wayawaya iti nagbaetan ti kinadakes ken kinaimbag, iti nagbaetan ti biag ken patay ket sadiay, iti kaunggan ti kinataona, kasapulan dayta a tao ti pannakaisalakan.

Marikna ditoy ti liday ni Papa Benedict XVI gapu iti agtultuloy a kinadamsak ken riribuk, ti pannakaabuso dagiti marigrigat, dagiti mairurumen ken nangruna, ti saan met laengen a pannakatumpong iti kappia iti nagbaetan ti Israelis ken Palestinian, iti Iraq, Sri Lanka, ken uray iti Africa ken dadduma pay a paset iti lubong.

“Pagamkak unay, ita a naragsak nga aldaw ti Paskua, ti Nagtengnga a Daya, ginudilan ti nagadu a krisis ken risiris, ket iyebkasko ti namnamak a maluktan ti dalan iti nainkalintegan ken nawatiwat a kappia,” nakuna ti Papa.

Mamatikami iti aripapa ti Papa iti masanguanan dagiti pagilian a tirtiritiren ti gubat, kinapanglaw ken kinadamsak. Wen, iti baet ti agloblobo a kinadur-as dagiti sumagmamano a pagilian, kamkammeten ti bisin, waw, ken kinapanglaw dagiti agindeg kadagiti pagilian a pagturturayan ti kinakuspag, kinagamrud, kinabuklis, ken kinadakes. Dagitoy ti agkasapulan iti pannalaknib, pannaranay, pannakaawat ken panangaasi.

Ti saludsod: kaanonto a mangngeg dagiti agintutuleng ti areng-engda, sungbatan dagiti agin-uumel dagiti parikutda, mangrikna dagiti bimmato ti pusoda kadagiti luada?

Wen, iti daytoy a panawen ti kinadur-as ken moderno a panagbiag, adu ti agkasapulan iti maysa a mannalaknib.

Ikarkaragmi a dumteng daytoy para iti isasangbay metten ti ayat ken kappia kadagiti tattao iti daytoy a Lubong. ##