Footer

Task Force Bersamin, agtultuloy agingga a masolbar ti pammapatay – PNP Chief

BANGUED, Abra – Kinuna ni PNP Director General Oscar Calderon nga agtultuloy dagiti nabuangay nga espesial a task force agingga iti masolbar ti pannakapapatay ni Dip. Luis Bersamin, Jr. ken agsubli ti talna iti daytoy a probinsia.

Inwaragawag pay ni Calderon a maipakaten ti election firearms ban iti Abra nupay mangrugi pay laeng daytoy iti katengngaan daytoy a bulan. Nupay kasta, impatalgedna a maikkan iti security escorts dagiti kameng ti pamilia ti napapatay a diputado.

Idauluan ni Director Jesus Versoza, hepe ti PNP Criminal Investigation and Detection Group (CIDG) ti Task Force Bersamin idinto nga idauluan ni Senior Supt. Eugene Martin, dati a hepe ti polis ti Abra ti Task Force Abra.

Napaltogan da Bersamin ken ti badigardna a polis iti ruar ti Mt. Carmel Church iti Quezon City itay Dis. 16.

Kalpasan ti tallo nga aldaw, inaresto dagiti polis ni dati nga Army M/Sgt. Rufino Panday iti pagtaenganna iti Makati City.

Inako ni Panday nga isu ti nagpaay a parasiput ket intudona dagiti kaduana a da dati a Vice Mayor Freddie Dupo ti La Paz, Abra, Dominador Barbosa, mapapati a nangpaltog ken ni Bersamin, ni Sonny Taculao, ti nagmaneho iti motorsiklo a naaramat iti panaglibas dagiti suspetsa, ken maysa a John Doe.

Kinuna pay ni Panday kadagiti inbestigador nga impalgak ni Dupo kenkuana a maysa a politiko iti Abra ti akin-utek iti pammapatay iti gatad a P5 million.

Mapapati nga agkandidato a para gobernador ni Bersamin iti masungad nga eleksion ket posible a kasangona ti asawa ni Valera nga agdama a mayor iti Bangued.

Ngem pinaglibakan ni Gov. Vicente Valera nga adda pannakainaigna iti pammapatay.

Kinuna ti gobernador nga awan ti pannakaammona nga adda plano ni Bersamin nga agkandidato a para gobernador a sumango iti asawana a posible nga agtaray iti nasao a puesto iti masungad nga eleksion.

Kabayatanna, nangibaon ti PNP iti 100 a polis a nangted seguridad iti pannakaipumpon ni Bersamin itay Dis. 27. Naiwayat pay dagiti check-points tapno maalay-ayan ti tension iti probinsia.

Rinibu dagiti dimmar-ay iti pamunpon ti diputado.

Kanaig daytoy, indagadag dagiti pamilia dagiti napapatay a lider oposision iti probinsia iti pannakainbestiga manen ti pannakapapatayda.

Malaksid ken ni Bersamin, napapatay da Mayor ti La Paz Mark Ysrael Bernos, Mayor ti Tineg Clarence Benwaren ken Mayor ti Tubo Jose Segundo.

Mapapati nga agpapada dagitoy a kritiko ni Valera.

Daytoy ti maikatlo a pannakapapatay ti politiko iti Abra iti daytoy a tawen.

Napaltogan ni Bernos idi Enero 13 bayat ti panag-buyana iti ay-ayam a basketbol iti plasa ti La Paz.

Nairaman a suspetsa ni Dupo a bise mayor ni Bernos ngem nagpukaw kalpasan iti pammapatay.

Napapatay met ni Board member James Bersamin bayat ti panag-joggingna iti plasa ti Bangued. ##

Comments are closed.