Footer

Ti ubing (Umuna a paset)

NEGOSIANTE ni Mr. Reyes. Masirib unay ket awan iti makaatiw kenkuana no maipanggep iti sinnumaran iti ganansia ken liksaben iti porsiento kadagiti amin a serkenna a kontrata. Graduado a cum laude iti BS in Accountancy. Top 6 iti board exam. Nagiinnagawan dagiti nalatak ken dadakkel nga accounting firm tapno agtrabaho kadakuada. Pinilina ti kalatakan unay. Ngem kalpasan ti sumagmamano a tawen, nagikkat tapno agsolo.

Nangipatakder kadagiti bukodna a negosio: accounting firm, consultancy firm ken iti kaudian, ti panangipatakderna iti holding company para iti real state.

Itoy a kinapartak iti panag-pangato ti career ni Mr. Reyes, adda met maipilaw kenkuana: natalek la unay iti kinalaingna ken awan ti makaatiw kenkuana. Ti rasonna: nasken a saan nga agpaatiw ti negosiante tapno saan a mappog ti negosiona. Dina serken ti aniaman a transaction a pakaabakanna.

Dayta ni Mr. Reyes. Nalataken a negosiante idinto a di pay nakasagpat iti uppat a pulo nga edad. Baro pay ket paginnaagawan dagiti agkaka-sirib ken agkakapintas a babai, ngem  dina intaltalek ken  liklilikanna ida. Impatona a ti kuartana laeng ti gamgamen dagita a babai. Kenkuana, itedna laeng dayta a kinabaknangna iti babai nga ayatenna.

Maysa nga aldaw, nagpa-Baguio ni Mr. Reyes para iti maysa a dakkel a kontrata iti real state. Panggepna met ti agdebelop iti subdivision.

Athletic ni Mr. Reyes. Naayat iti ehersisio. Isu a dayta a bigat, nagjogging a kaduana ti drayberna iti aglawlaw ti Burnham Lake.

Agal-alen ti drayber ngem tuloy latta ti panagjogging ni Mr, Reyes. Mabain ti drayber nga aginana isu nga intuloyna  ti nagjogging.

“Danum, sir?” inyupreser ti maysa nga ubing a babai ti lakona.  Nakasandalia ti ubing ken takuptakop ngem nadalus ti bestidana.

Immabay ti ubing kadakuada ket nakigiddan nga agtaray. No mabalin, kayat nga agawen ti drayber ti plastik a naglaon iti danum ket itangadnan nga iyibus. Ngem nagparbeng.

“Ipadawatmo wenno ilakom?” kinuna ni Mr. Reyes. Usarenna latta ti kinasiribna iti ubing nga aglaklako iti danum.

“Siempre lako, sir! Balonko met a mapan agiskuela ti ganansiak…”

“Maikamanokan?” inamad ti drayber.

“Grade Six. Consistent honor pupil since prep…”

“Tulademto ni sir, nalaing a negosiante. Daras a bimmaknang ta nalaing a negiosiante…” kinuna ti drayber.

“Saan laeng a tuladen, sir, abakek pay a…!”

“Saan pay a naiyanak ti mangabak ken ni sir!”

Arigna dumanon iti dapan ti isem ni Mr. Reyes iti panangisakit kenkuana ti drayber.

“Ala, awan no awan ngem gumatangkayo ngaruden, sir…”

“Mano?” kuna ni Mr. Reyes.

“One thousand pesos, sir, ti maysa bote…”

Dandani naitikleb ti drayber. Nagsardeng ni Mr. Reyes a nangkudkod iti di met nagatel a tuktokna.  

“Sag-ootso pesos ti puonam. Husto ti sangapulo pisosen! Adda met dos pisosmon! Nagngina ketdin no one thousand!” makasiudot ti drayber ket makaam-ampalingen iti ubing.

(Adda tuloyna)

Comments are closed.