Footer

Emerhensia a miting, konsultasion para iti Cha-Cha, angayen dagiti gobernador

MANGANGAY ti League of Provinces of the Philippines iti emerhensia a miting iti mabiit tapno maammuan no ania ti pagtaktakderan a posision dagiti kameng.

Daytoy ti impakaammo ni Gov. Luis “Chavit’ Singson, chair ti nasao a gunglo dagiti agtuturay iti probinsia, itay nabiit iti sanguanan ti kabar-baro a tignay a mangiduron iti charter change babaen ti maysa kadagiti wagas nga intuding ti Konstitusion kas iti people’s initiative, constituent assem-bly wenno constitutional convention.

Kinuna ni Singson a napag-aanamonganda ken ni Bohol Gov. Eric Aumentado, presidente ti gunglo, ti pannaka-angay ti miting tapno maam-muanda ti pudpudno a kari-rikna dagiti kamkameng mainaig iti pannakabalbaliw ti konstitusion.

Innayonna a kalpasan ti open forum, pagbubutosanto dagiti kamkameng no iduronda ti charter change babaen iti maysa kadagiti ipalubos ti Konstitusion a wagas.

Itay nabiit, indeklara ni Pres. Arroyo ti agtultuloy a pana-ngiduronna iti charter change iti baet ti panangibasura ti Korte Suprema iti petision ti Union of Local Authorities of the Philippines (Ulap) ken ti Sigaw ng Bayan a panna-kabaliw ti konstitusion babaen ti people’s initiative ken ti nadiskarada a constituent assembly nga impagna ti Kamara.

Kinuna ti Malakaniang a silulukat iti aniaman a wagas a pangbaliw iti konstitusion.

Naammuan a panggep dagiti gobernador a konsultaen dagiti kailianda a pakairamanan dagiti lider ti barangay, grupo sibil ken dagiti opisial ti Simbaan tapno ammuenda ti pagtaktakderan dagitoy mainaig iti charter change.

Kinuna ni Singson a kayatda a maammuan ti sentimiento dagiti tattao mainaig iti Cha-Cha idinto nga inyunay-unayna a dagiti gobernador ti kasayaatan iti posision a makarukod iti pagayatan dagiti umili.

Innayon ti gobernador a kayatda a saan a mangbingay daytoy nga isyo no di ket mangkaykaysa kadagiti tattao.

Kadagiti immun-una nga interbio iti gobernador, imbatadna a saan a pabor iti unicameral a parliamentaria agsipud ta dagiti laeng babaknang a politiko ti makabalin nga agbalin a kameng ti parliamento.

Kinunana pay nga iti babaen ti nasao a porma ti gobierno, saanton a dagiti tattao ti mangpili dagiti panguloda no di ket dagiti kameng ti parliamentaria.

“Nasaysayaat met laeng no dagiti umili ti mangbutos iti mangidaulo kadakuada,” kinuna ni Singson.

Inyunay-unay ni Singson a pabor iti pederal a presidensial a porma ti gobierno .

Kabayatanna, maipagarup a rinugianen ti Kampi, partido ti Presidente ken ni dati a dadaulo daytoy, ni DILG Sec. Ronaldo Puno, ti kampania kadagiti lokal nga agtuturay a mangipilada iti maikadua a petision iti Commission on Elections para iti people’s initiative.

Nupay kasta, simple laengen ti petision ta agbalin ti kongreso a unicameral iti babaen met laeng ti presidensial a sistema. ##

Comments are closed.