Footer

Pagpanunotan koma dagiti agtuturay

Kuna ti administrasion ken dagiti kaaliadona a panawenen tapno mabaliwan ti konstitusion ken ti porma ti gobierno para iti nadardaras a panagdur-as ti ekonomia.

Kasapulanen a masuktan ti porma ti gobierno manipud iti presidential iti parliamentaria tapno mapukawen ti gridlock a parnuayen ti saan nga agkatunosan a Kamara ken Senado ken Senado iti opisina ti presidente. Gapu iti daytoy a situasion, nabuntog (kuno) ti pannakaipakat dagiti programa ti turay ken pannakaipasa dagiti linteg a mangipaay iti pagsayaatan dagiti umili.

Yan ti karona, dillawiten dagiti pro-charter change dagiti umili nga “aglaplapusanan a mangsuporta” iti charter change kalpasan a “nalawlawaganda” kadagiti pagsayaatan iti parliamentaria.

No kastoy ti karirikna dagiti umili, apay a sabali met ti rummuar kadagiti surbey no kanunongan wenno saan dagiti umili ti charter change?

Iti surbey idi Hunio 22-28 ken Set. 24-Okt. 4, nalawag ti sentimiento dagiti respondante: dida kayat a mabaliwan ti Konstitusion!

Iti surbey itay naudi a kuarto ti tawen, “saan” latta a kayat dagiti umili ti Konstitusion nga iduron ni Pres. Arroyo.

Kitaentayo ti resulta ti surbey nga inwayat ti Social Weather Station iti 1,200 a respondente manipud Nob. 24-29:

  • 74 porsiento iti Metro Manila ti agbutos iti “No” no adda maangay a plebisito iti baro a konstitusion. Nupay bimmaba manipud iti 85 porsiento idi Setiembre, 67 porsiento iti Luzon ti nagbutos iti “No”; 57 porsiento iti Visayas; ken 69 porsiento iti Mindanao.
  • Uray dagiti kontento iti gapuanan ni Pres. Arroyo, kaaduanna ti agbutos iti “saan” no adda maangay a plebisito iti baro a Konstitusion nga iduron ti Presidente.
  • 54 porsiento kadagiti kontento iti performance ti Presidente, 57 porsiento kadagiti agwaliwali no kontentoda wenno saan, ken 79 porsiento kadagiti saan a kontento kenkuana ti agbutos latta iti “Saan” no adda maangay a plebisito iti iduronna a baro a Konstitusion.

Maikontra iti ibagbaga ti Sigaw ng Bayan a nailawlawag kadagiti tattao dagiti maibalbaliw iti Konstitusion, agdagup iti 73 porsiento ti nagkuna a dida ammo dagiti singasing a nadakamat iti people’s initiative.

Ngem 37 porsiento kadagiti respondante iti kontra iti singasing a mapalubosan dagiti kameng ti parliamento ken ti prime minister a mamin-adu nga agpailayon, 43 porsiento ti kontra nga agserbi dagiti nakatugaw iti puesto iti interim parliament agingga iti sumuno nga eleksion, nga itudingda ti petsana, idinto a 34 porsiento iti kontra nga agiserrekda iti sabsabali nga amendments iti konstitusion iti uneg ti 45 nga aldaw.

Namitlon nga agkaasping a kastoy ti limtuad iti surbey. Agparparang ngarud a saan a pudno ti ibagbaga dagiti pro-charter change a karirikna ken timek dagiti umili ti panagbalbaliw ti Konstitusion. Pagduaduaan ngarud a saan a dagiti umili ti ibagbagian daytoy a grupo iti panangiduronda iti charter change no di ti managimbubukod nga interes ken panggepda.

Pinatalgedan ti surbey ti pangngeddeng ti Korte Suprema a maysa laeng a panangallilaw kadagiti tattao ti tignay a panangbaliw iti Konstitusion babaen ti people’s initiative.

Kastay kuna: maallilawmo dagiti tattao iti maminsan ngem saan nga iti amin a gundaway. Ngem iti kanito a mapunnuan dagiti tattao, apiten dagitoy a grupo ti pungtotda, kas iti irurukkuas dagiti sumupiat a timek iti di panangikabkabilanan ti Kamara iti Senado iti panangbaliw iti konstitusion.

Leksion daytoy a dakkel dagiti agtuturaytayo. Uray kasano ti kabilegda, no rumkuas dagiti timek a sumupiat kadakuada, napigsa a puersa a mangsulnot kadakuada iti puestoda!