Footer

Phil. Army, nangiwayat pulong-pulong, medical mission

STA. LUCIA, Ilocos Sur – Nangisayangkat itay nabiit ti 50th Infantry Battallion, 5th Infantry Division ti Philippine Army iti pulong-pulong, ken medical ken dental mission agraman iti panangted iti regalo kadagiti ubbing nga agnaed iti barangay Bani, ditoy.

Indauluan a mismo ni Lt. Col. Harold Cabreros, agdama a Battallion Commander ti 50th IB, 5ID ti Army ti nasao a programa, a nakikammayyetan ti local government unit ditoy, Rural Health Unit, PNP, nadumaduma nga NGO ken dagiti barangay officials iti daytoy a barangay nga idadauluan ni Kapitan Romulo Calura.

“Napimpintas a kastoy ti aramidenmi a panangtrato kadagiti umili iti barangay tapno saanda a maguyugoy a sumrek iti sabali a puersa.  Liklikan pay laeng ti gubat, kinuna ni Cabreros bayat iti interbio kenkuana ti DZTP ken Tawid News Magasin.

Kabayatanna, inaklon ni Kapitan Romulo nga iti napalpalabas, talaga nga adda dagiti mapapati nga NPA a sumsumrek iti barangayda, ngem manipud iti kaaddan dagiti Army iti barangayda, awanen dagiti sumsumrek a kanigid a grupo.

Paset ti programa ti pannakaipaay iti serbisio iti salun-at dagiti bumarangay, pannakaited iti regalo kadagiti ubbing, ken ti mass oathtaking dagiti bumarangay kas kameng iti Alliance of Defenders of Democracy.

Comments are closed.