Footer

Ti ubing (Maudi a paset)

NEGOSIANTE nga ubing daytoy,” nagkatawa ni Mr. Reyes.

“Saankayo a gumatang, sir?”

“Natural, saan!” arig naggiddan da Mr. Reyes ken ti drayber a simmungbat. Nagtugawda iti semento a tugawan a sumango iti Burnham Lake . Sadiwa ti angin ket maimasanda ti umanges iti bannogda a nagjogging. Nakamagmagan ti karabukobda a dua.

Nangiruar ti ubing iti sangasupot nga Sky Flakes. Nangrugi a nangan.

“No diyo kayat iti gumatang iti danumko, mangankayo ngarud iti Sky Flakes.” Inyawatanna ida iti sagsasangasupotda. “Agsangitak la ketdi ket ibagak a kinabildak no dikay mangan. Maidarumkayo iti child abuse…”

Inkapilitan a nangan dagiti agamo. Dida kayat ti eskandalo.  Maayatan pay ketdi dagiti dua ta pilia ti ubing a mangsutsutil kadakuada. Agsinnublat pay ti panangsubo ti ubing kadakuada iti biskuit.

Idi nakatilmon dagiti dua iti saggatloda ken napno pay laeng ti ngiwatda iti biskuit, naspelandan.

Arigna dida payen makasao iti ispelda!

“D-danum…hik-hikkannak…” imbeddal ni Mr. Reyes.

“Huray siak…hikkannak…d-danum,” kinuna met ti drayber.

“Two thousand pesos ti maysa a botelia…”

“Hania! Sal-itka nga ubing! Itedmon, matayakon…!” kinuna ni Mr. Reyes a marigatan payen nga umanges.

“Kuarta pay! No diyo kayat, innakon!” Naginpapanaw ti ubing.

Kimmaut ni Mr. Reyes iti petakana  ket inyawatna ti uppat a sagsasangaribu iti ubing. Naginnunadan iti drayberna a nangitangad iti naiplastik a danum.

“Nagngina ket daytoy a danumen!” kinunada a dua ket insurotda laengen dagiti matada iti napartaken nga umadayo nga ubing….

KANAYON a sumangbay iti biagtayo ti maysa nga ubing. Ket no dadduma, awitda dagiti pudpudno a burburtia ti biag. Saantayo ida nga ik-ikkan iti importansia gapu ta ubbingda. Ngem adda kadakuada ti ladawan ti kinainosente. Adda kadakuada ti ladawan ti kappia ken kinasirib. Adda kadakuada dagiti katkatawa ken isem.

Itoy a baro a tawen 2007, sumangbay manen ni ubing a Jesus kadatayo. Awitna ti kinasirib. Ti kappia. Ti Ayat. Ti namnama.

Maipapan iti “Ti pannakasarak ni ubing nga Jesus idiay templo ti ebanghelio itay Disiembre 31, 2006. Makisarsarita kadagiti mamaestro dagiti Judio. Masmasdaaw dagitoy a mamaestro iti kinasirib ti ubing…..

”Adda sirib nga awit iti tunggal ubing. Sirib a di pay natibnokan iti pitak ti lubong. Sirib a saguday iti napudpudno a panagbiag. Iti panangselebrartayo iti isasangbay ti baro a tawen, adda koma kadatayo ti Dios. Umuneg koma iti puso, panunot ken riknatayo ti pudpudno a kaipapanan ni ubing a Jesus. Saantayo koma paitulok nga awanen ti makaabak pay iti kinasiribtayo amangan no maituladtayo ken ni Mr. Reyes ken ti drayberna nga inatiw ken inutekan laeng ti maysa nga ubing.

Adda nagtaudan ti amin a kinasirib ken kinabaknang…ammuen koma no asino.

NAGASAT A BARO A TAWENYO AMIN!

(reference: Lk. 2:41-52)