Footer

Balikbayan, napaltogan, natay

NARVACAN, Ilocos Sur – Natay ti maysa a balikbayan manipud Hawaii kalpasan a pinaltogan ti dua a lalaki iti sanguanan ni baketna idiay barangay Cagayungan, iti daytoy nga ili.

Nabigbig ti biktima a ni Rogelio Pascua, 52, agnaed iti dayta met laeng a lugar babaen kadagiti nakamotorsiklo a saan a nabigbig a lalaki.

Iti inbestigasion ti pulisia, naammuan a kalkalpas ti biktima agraman ti baketna ken maysa a kabagianda a nagikarga iti lasona iti asideg ti balayda idi immasideg ti dua a lalaki a nakasakay iti motorsiklo a jumper, awanan iti plaka.

Sinaludsodda ti nagan ti kaarubada a sinungbatan ti biktima. Kellaat nga inruar ti akinlikud a suspek ti paltogna ket pinaltoganna ti biktima iti namin-adu a daras.

Naglibas dagiti suspetsa iti saan a masinunuo a direksion.

Kas maibasar dagiti uppat a kapsula a narekobre iti nakapasamakan ti krimen, naaramat ti kalibre 45 iti pammaltog.

Naitaray iti ospital ti biktima, ngem saanen a naidanon ti biagna.

Di pay ammo ti motibo ti pammapatay.