Footer

BOSS, insayangkat ti Candon City

CANDON CITY – Para iti nadardaras a pannakaited iti serbisio kadagiti umili, nangruna dagiti negosiante ken traysikelan, insayangkat manen ti city government ditoy ti Business One Stop Shop (BOSS).

Daytoy ti naammuan manipud kenni Jean Abrero, agdama a City Business Permit and Licensing Officer ditoy bayat ti interbio kenkuana ti DZTP Radio Tirad Pass ken Tawid News Magasin.

“Manipud idi Enero 2 agingga iti Enero 20 a maisayangkat ti BOSS a tapno maaddaan iti gundaway dagiti amin a negosio ken traysikelan manipud iti 42 a barangay nga aggala iti lisensiada,” kinuna ni Abrero.

Kinuna ni Abrero nga adda naituding nga iskediul dagiti residente tunggal barangay nga agpabaro wenno agaplikar iti lisensiada. 

Innayon ti licensing oficer nga uray iti Sabado ken Domingo, nakasagana dagiti personnel ti city government a mangipaay iti serbisio kadagiti residente nga awan ti wayada iti weekdays.

“Tapno saanda unay a marigatan, adda service vehicle nga agitulod kadagiti taxpayers manipud ditoy kabarbaro a city hall agingga iti sentro ti siudad,” innayon ni Abero.

Dinakamatna a mangipaay iti serbisio dagiti national agencies a pakairamanan ti Social Security System, Philhealth, ken Department of Trade and Industry kabayatan ti BOSS.

Kinuna ni Abero nga iti 2007, P7 million ti target income ti siudad iti BOSS. Itay napalabas a tawen, nasurok a P5 milion ti nakolekta ti city government iti one-stop shop.