Footer

Nakabilbileg nga agus

Naglusulos iti takemna, dua nga aldaw kalpasan nga imbatad ni Undersecretary Zozimo Paredes, executive director ti Presidential Commission on the RP-US Visiting Forces Agreement (VFACom), nga “innala ti Palasio ti linteg iti bukodna nga ima” iti pannakaiyalis ken ni Lance Cpl. Daniel Smith idi tumengnga ti rabii ti Dis. 29 manipud iti nakaipupokanna iti Makati City Jail ket naisubli iti Embahada ti Estados Unidos iti Manila.

“Umayonak iti pannakaisublina (Smith) ngem maiwayat koma a nasayaat – awan pinnilitan, awan kinnigtotan,” nakuna ni Paredes ket krinitikarna ti Malakaniang gapu ta inruarna lattan ni Smith iti nakaibaludanna iti baet nga awan pay ti otorisasion manipud iti Court of Appeals.

Ngem no patien dagiti kameng ti Gabinete ni Pres. Arroyo a pakairamanan ti sekretario ti Department of Justice, Foreign Affairs, ti Presidential Legal Adviser, maikanatad iti linteg ti pannakaiyalis ni Smith agsipud ta sursurotenda laeng ti katulagan ti Pilipinas ken ti US mainaig iti VFA.

Raemenmi ni Paredes gapu iti kapanunotanna. Nupay maikontra iti pagtaktakderan ti Malakaniang a ngatuen ti opisina a yanna, saan a nagamak a nangibatad iti kapanunotanna nupay ammona a maisagmak ti puestona.

Ngem naminsan pay a nalukaisan nga iti daytoy nga administrasion, masapul nga agtakder amin dagiti adda iti babaenna iti linia nga inyugedna, uray kadagiti kontrobersial a polisia wenno gannuat nga iwayatna.

Saantayo a mababalaw ti Malakaniang iti daytoy a paglinteganna. Rumbeng laeng a salakniban dagiti kameng ti Gabinete dagiti programa, gannuat, polisia ken interes ti Malakaniang. Kasapulan a maymaysa ti timek dagiti kameng ti Gabinete tapno makita ti publiko nga adda panagtitipkel ken panagkaykaysa da, kas maysa nga agmaymaysa a pamilia.

Ngem iti maysa a bangir, no pasig lattan a “wen” ti sungbatda iti Malakaniang aniaman nga iwayatna, maparnuay laeng kadagiti umili ti ladawanda a “paspasurot”, “tuta”, “patpatiray-ok” ken no ania ditan a birngas.

Kasano a maammuan ti Malakaniang dagiti posible a dakes a paltuaden iti iwayatna a gannuat no awan met ti addaan iti tured a mangiyebkas iti maikontra a kapanunotanna?

Saan a mailibak nga iti napalabas, adda dagiti inwayat ti agdama a turay a sinupalpal mismo ti Korte Suprema agsipud ta saan a maiparbeng iti linteg.

Kadagitoy nga isyo, mano kadagiti kameng ti Gabinete ti nangibisik iti ikokontrada?

Ngem no kontraem ti Malakaniang, namnamaem a subaem ti nakabilbileg nga agus a mabalin a pakaigapuan ti pannakaiwalinmo. Maipalagip ditoy ti napasamak ken ni Defense Secretary Avelino Cruz. Saan a simmurot itri agus mainaig iti people’s initiative kas wagas a pangbalbaliw iti konstitusion. Adu ti napagurana a kameng ti Gabinete a puon ti naglusulosanna.

Adda pagkaarngian ti napasamak kada Cruz ken Paredes. Sinubada ti agus ngem nakabilbileg daytoy ket naiyanudda iti katangkatang.

Addanto pay sumaruno kada Cruz ken Paredes no agtultuloy latta ti iririmbaw dagiti “tiuwawa” ti Malakaniang kadagiti kontrobersial nga isyo uray iti baet ti pannakailidding ti kalintegan ken interes dagiti umili.

Ngem dagitoy ti rissik iti kasipngetan a mangted sangkablling a lawag kadagiti dandanin maawanan namnama nga umili.

Comments are closed.