Footer

Ni Lakay Iban Kilabban (Umuna a paset)

LASTOG a laklakayan,” impugtit ni Ikit Cion ti ammalna a pinadis iti siudotna ken ni Uliteg Steve.

Sutsutilen ni uliteg ni ikit babaen ti panangpaburborna a nalaing ti motorsiklona. Yad-addana a paburboren no agbassawang ni ikit. Talaga a mangang-angaw. Kidday pay a kidday kaniak a nakamasngaad a mangbuybuya iti ar-aramidenna. Irengrengrengko ngamin a suruannak nga agmaneho.

“Inka araduen ‘diay pagmulaan ti lasona, kunak!” imbugtak ni Ikit iti pirmi, sana pay minulagatan ken binaniekesan.

“Dika agung-unget, ta nalakaka a bumaket, dungngo!”

“Hungho ha hupam, a!” indil-ag ni ikit ta nakaammal manen iti pinadis. Binitbitna ti sangatimba a binugbog nga indissona itay ket nagturongen iti ubong a yan dagiti gumanukgok a baboy iti asideg.

“Uray ta sikatton ‘toy lakaymo. Agasem aya ti maawagan iti kampeon!” inggarakgak ni uliteg, sa kalpasanna, nanglangit ket kunam la no agbilbilangen iti minilion a bituen iti dayta a bigbigat.

Sinublatko a kinudit ti motorsiklo.

“Di kadi, balong?” inggarakgakna manen, ngem diak nakasungbat ta diak nasiputan ti panangtambiogna iti bukotko a puon ti pannakakelkelko iti uyek. Ti laklakayanen a durgi! imbassawang met iti unegko.
Sagsaganaan ngamin ni uliteg ti 5th Open Motocross a maangay inton piesta ti San Antonio a lugarmi, dua a bulan laengen manipud ita. Arapaapna kano ti agbalin a motorista.

“Pui! Agbibisin a laklakayan, balsigekto pay ketdi ti hal-atta a motorsiklo ta makitam,” indil-ag ni ikit. Inkalkagna ti timba iti ulo ni Labang a manalnali iti ubrana.

“‘Ta badang ti  ‘laem, baket, ta silianen ti kaldona,”inrungiit ni uliteg a nangsaltan iti motorsiklo. Winitwitan ni ikit, ginammatanna ti binalsig iti asidegna. Ngem alisto ni uliteg a nangpakayaskas iti motorsiklo.

Binuladas ni uliteg ni Uliteg Timot a kabsatna idiay Hawaii: Ala, man, adik, pangaasim man ta paw-itannak iti igatangko iti traysikel. Imbag la a gastosen nga agkolehio dagiti tallo a bulog a kaanakam ti makariadaan. Sapay no di adda met utekda. No awan koma, pagtalonek laengen ida. Agsubalitkamto iti kinadungngom kadakami.

Pinaw-itan met a dagus ni Uliteg Timot ta nasayaat kano ti sapulna iti kaubasan idiay Estet. Ngem imbes a traysikel ti nangigatanganna, pangkarera ketdi a motorsiklo. Banag a pagsubsubanganda nga agassawa. Uray no uppat a pulo a kalgawnan, agduyos pay laeng iti lumba ken pinnalagto iti motorsiklo. Idolona ni Juvy Saulog. No motocross ti tungtongan, awan ti makaatiw. Kabisadona amin a  motorista, uray dagiti ganggannaet. Daytoy ti esportko, kunkunana.

Ti imasna, pati timmangken nga Iban a naganna, sinuktanna iti Steve manipud idi addan motorsiklona. Iban Kilabban ti birngasna kadagiti kabaddungalanna ta   managkilabban. Ngem naiyuttotnan ti agkilabban manipud addan motorsiklona. “Call me Steve, man! Steve, not Iban!” Artiokanda met, ket lalo la ket ngarud ti lastogna. Lalo no maipapan iti kinabaked ti motorsiklona ti saritaan, mangipatakder la ketdi iti uppat ti sulina ken pulotan. Kaaduan a pangkariada dagiti motorsiklo idtoy barangaymi. Manmano ti addaan iti Enduro  a kas iti kukuana.

Laklakayankayo la ngaruden, paartiokankayo pay laeng, uliteg, kunak koma ngem amangan no dinakto pagiggemenen iti motorsiklo. Numona ket nakasursuroakon nga agpataray. Arapaapko met ti maaddaan iti traysikel. No adda gasat, bareng no makaurnongak iti pagiskuelak uray no kinamekaniko laeng. Narigat ti estambay.

Nadlawko a kasla napukawen a naminpinsan ti interesna nga aggamulo iti daga. Patudonenna lattan ni Manong Illo. Isu ti maturturtoran nga aggamulo kadagiti talonda. Sa la tumapog iti talon no agmulakami iti tabako. Pagayusen ngamin ni ikit ti hinebra ken sapsapuriket. Ngem ti imasna, diktar, wagis ken tudo met amin nga aramidna. Awan dumana ‘tay mayordomo. Saan man la a mangitugkel iti uray no sangapuon la koma a birhinia. Magasgas kano ti manikiurna. Dina met kayat ti agiggem iti hose ta para sibug la koman. Ngem karugitna met ti mapitakan.

Masemsem la unayen ni ikit kadagitoy nga aramid ni uliteg iti taltalon. Isu nga iti naminsan, inyuma a binarsak ni ikit iti kasla tumeng a bingkol ket nanabtuog iti rusokna. Nagil-ilus a nagawid. Imbag ta dina tinupakan iti palpal. Binagtinna idin ket a tupakan ni uliteg ngem naigawidko. Saan met ketdi a lumaban ni uliteg. Maamak ngata a ta balkat ni ikit idinto ta kuddapit. Agkataytayagda iti lima a kadapan ken lima a pulgada.

Naespotingen ni uliteg. Pasaray atiwennakami payen nga agtutubo. Layp begins at porti! kunkunana man. Kundi sagawisiw pay uray no sawaw. Gimmatang pay ketdin iti siedna, ‘tay ala-Randy Santiago.

“Itugawmo laengen ‘diay sango ti simbaan wenno ‘diay tiendaan, sigurado a makakuartaka, loko!” indil-ag ni ikit ti suronna.

“Uso, dungngo, uso!”

Pagunianna amin nga am-ammona. Isemanna amin a dina am-ammo. Wagis a wagis a kunam la no artista. Adu met ketdi a, ti makaisem itoy nga aramidna.

Armendo pay ketdin. No madamag la ni ikit, diak ala ammon. Rungrungduen la ketdi ni ikit. Rapas ni Ikit. Namak payen no diay wasay ti ikamatna?

Ti imasna, pati ni Celing ket armenna. Kaanakan ni Baket Burcia a pensionada ni Celing. Taga-Malasique, Pangasinan. Ken sabsabongek. Ribalenna met dataon!

“No nobiakon, ‘liteg, armenyo pay laeng?” inlastogko nupay dinak pay sinungbatan ni Celing. Kinitanak a kasla mangrukrukod sa kellaat a naggarakgak.

“Apir, balong, apir!” ket nagtinniplak dagiti kanawan a dakulapmi. “Kasta a ti baro!” Pinikpikna ti kanawan nga abagak. “Good boy, good boy!”

(Adda tuloyna)

Comments are closed.