Footer

San Esteban Police: opisial ti Army prime suspect iti Manegdeg slay

BAGUIO CITY – Maysa nga opisial ti Philippine Army a nakabase iti umuna a distrito ti probinsia ti Ilocos Sur ti naitudo a kangrunaan a suspetsa iti pannakapapatay ti maysa a coordinator ti gunglo a tumultulong kadagiti mannalon iti Ilocos ken Cordillera.

Impakaammo ti Cordillera Human Rights Alliance a segun iti report manipud iti San Esteban police ti Ilocos Sur, naitudo a ni Capt. Joel Castro ti 50th Infantry Battalion kas kangrunaan a suspetsa iti pannakapapatay ni Jose “Pepe” Manegdeg, coordinator ti Rural Missionaries of the Philippines in the Cordillera and Ilocos.

Kanaig daytoy, kinuna ni Maj. Ferdinand Razalan, spokesperson ti Northern Luzon Command, a nakasagana ti NolCom a mangawat iti aniaman nga inbestigasion maikontra ken ni Castro.

Impresenta ti CHRA ti kopia iti report ti San Esteban police bayat ti maysa a forum a naangay ditoy siudad itay nabiit.

Kinuna ni Atty. Randy Kinaud, secretary general ti CHRA, nga intudo ti maysa a saksi ni Castro a nangpapatay ken ni Manegdeg.

Segun iti di nainaganan a saksi, lima ti kadua ti suspetsa idi paltoganna ni Manegdeg.

Kabayatanna, naammuan iti San Esteban police a dati a naka-assign ni Castro iti military intelligence ti 50th IB.

Segun pay iti police, nabigbig ni Castro babaen ti cartographic sketch ti suspetsa a nangpaltog ken ni Manegdeg.

Maipalagip a kagapgapu ni Manegdeg iti seminar nga inangay ti Ilocos Human Rights Advocates iti maysa a beach resort iti Apatot, San Esteban, Ilocos Sur ket agur-uray iti luganna nga agpa-Manila apaglabes ti alas 10 ti rabii ti Nob. 28, 2005, iti Sitio Musoc, Barangay San Nicolas idi mapasamak ti pammapatay.

Kinondena dagiti militante a grupo ti pammapatay a kinunada nga insayangkat ti grupo a paramilitary.

Segun iti nangitulod ken ni Manegdeg, kiniddaw daytoy nga aguray agingga iti makalugan.

Kinuna ti saan a nainaganan saksi a maysa a van a naggapu iti amianan a direksion ti nagsardeng iti sanguanan ti tricycle sa nag-U-turn. Rimmuar ti maysa a lalaki ket nagturong iti waiting shed a yan ti biktima bayat a makipatpatang babaen ti selponna. Kalpasanna, imbolsana ti selpon ket inasutna ti paltogna.

Segun pay iti saksi, pinadas ti biktima ti nagtaray idi makitana ti suspetsa nga umas-asideg.

Dinagdagus metten ti saksi a pinakaskas ti tricycle nga immadayo kalpasan a nakangeg iti putok.

Kinuna ni Kinaud a pagyamananna ta adda saksi a nagtured a mangted iti impormasion tapno mabigbig ti suspetsa.

Dinayawna met ti polis gapu iti panangruk-atda iti nasao a report.

Comments are closed.