Footer

Wet market vendors dida nagbayad iti entrada kas protestada

CANDON CITY – Sumagmamano a nga aglaklako iti merkado publiko ditoy ti saan a nagbayad iti inaldaw nga entradada kas panangipakitada iti protestada iti agtultuloy a panaglako dagiti illegal wet market vendors iti likudan iti Candon Supermarket.

Kinuna dagiti aglaklako nga agtultuloy ti saanda a panagbayad iti tiketda agingga iti saan nga aksionan dagiti opisial ti tiendaan publiko nga idadauluan ni Alberto Abaya ti reklamoda.

Indagadagda ti panakatiliw dagiti aglaklako iti likudan iti supermarket a maiparit a paglakuan kadagiti natnateng, karne ti manok ken baboy.

Nupay kasta, inyunay-unay dagiti tindera nga awan ti nagtutulaganda iti panagprotestada.

“Daytoy ket kapanunotanmi, awan ti nagtutulaganmi, dagiti kayatna agbayad, agbayadda latta; dagiti dida kayat agbayad ket dimi met tinulagan,” kinuna ni Lydia, maysa a wet market vendor ti Candon.

Namungangay daytoy a problema gapu iti agtultuloy a panaglaklako dagiti dadduma a tindera iti Gaerlan street ken Madarang street iti San Isidro.

Ngem inkalintegan dagitoy a narigatda ngamin a makalako iti wet market gapuna a napilitanda nga aglako kadagiti nasao a kalsada ta ditoy ti umay ti gumatangan dagiti aggatgatang agsipud ta as-asideg ditoy ken dida kasapulanen ti agtraysikel  agingga iti wet market.

Kabayatanna, nangiwayat ti market administration babaen ti panangidaulo ni Abaya iti panagtiliw kadagiti illegal vendors ken kinumpiskada dagiti depektibo a pagkilosan. Nangtuding pay ni Abaya kadagiti agbantay iti nasao a disso.

“Ita nga agbanbantaykami, awan ti makita nga aglaklako ditoy, ngem inton pumanawkami, addadanto manen nga aglako,” linagidaw ni Abaya.

Nabayag metten daytoy a problema iti merkado publiko iti daytoy nga lugar ngem agpapan kadagitoy a gundaway ket saan a masolbar gapu iti agtultuloy a saan a panagtungpal dagiti illegal vendor.

Sumagmamano metten nga option ti inwayat dagiti opisial ti tiendaan publiko, pakairamanan ti panagbalin a talipapa daytoy a disso ngem awan ti nagmamaayanna.  Saan met a nagballigi ti naiyussuat nga aglako dagiti tindera iti bigat iti wet market ket aglakoda iti malem ditoy agsipud ta bigat pay laeng, addan dagiti aglaklako.

Indarirag ni Abaya kadagiti aggatgatang iti dida pannakitienda iti likudan iti supermarket tapno masursuruan dagiti tindera nga aglako iti wet market.