Footer

Ni Lakay Iban Kilabban (Maudi a paset)

“EDONG,” riniingnak ni uliteg iti dayta a malem. Nakauldagak iti papag iti sirok ti nalayog a salamagi iti amianan ti balay.

“Kaska met la Intsiken, ‘liteg.” inyisemko nupay iti unegko ket masemsemak iti pannanakasinga ti turogko. “‘Da ‘ya agarem met iti alas tres?”

“‘Ta ‘diay taltalon,” kinunana ket timmallikuden.

Aramidenmi ngata, aya, idiay taltalon? Naglimpion san ti ulona, apo. Agringkon ngatan kadagiti mulada a birhinia. Ngem apay a nakakras helmet met?

“Agpraktis man datao nga agpasang-at iti tambak.” kiniddayannak.

Nadadael ti ulo ti lakayen, kinunkunak laengen nga aglinglingaling.

Apagtapogmi pay laeng iti kataltalonan, naibalatkamin. Dinanto met kitkitaen ti dalanmi. Ti met ngamin balasang ni Tang Gorio a nakapugiit nga agsugsugot iti tabako ti turong dagiti matana. Naiyabut la ket ngarud ti kamauna a pilid ti motorsiklo. Imbag la ketdin ta naisigkatmi dagiti sakami ta no saan, sigurado nga agtaraken datao iti dugol ken dungir.

“Tsiken, balong!” pasaray igarakgakna. Sabagay, uray kano idi agtutubo ket nalaingen nga agpasang-at kadagiti tambak. Naisardengna daytoy nga aramidna sipud nagasawa. Tuladenna amin a mabuybuyana iti sine ken motocross.

Pinadasna a palagtuan ti pagatsellang a tambak ngem naibalat.

Saan la a pasang-at ti inubrana. Patalaytayanna pay dagiti akikid a tambak. Agkaragistayan matumba. Natimbeng pay laeng dagiti takiagna. Palakpakak met a pangar-artiokko. Yad-addana met ti agpabilib. Pasang-atanna payen dagiti nababa ti pempenna a garami.

Sinardenganna ti nasurok sangatao a pempen ti garami. Tung-ed a tung-ed. Ammok lattan ti aramidenna idi ipasarangna kaniak ti naipangato a kanawan a tangan ti imana.

“‘Nia, ‘liteg, pasang-atanyo deta?” Isarsaraknan a talaga ti karadkadna, indayamudomko.

“Kayangkaya, balong!”

Inikkak iti saggaysa a reppet iti pagtapuakanna ta sagdudua a pulgada ti rengngat ti daga.

Uray no agludonkayon. Pakawanem, Apo! naitanamitimko. Nadadael ti ulo daytoy a lakayen. Bassit la a kamali, sigurado a ni lakay Itong a mammullo ti pangitulodak kenkuana.

“Nangaton sa met unayen, uliteg?” impakdaarko.

“Puonay a danagmon, balong,” ket pinaburbornan ti motorsiklo. Binuelluanna iti sangagasut a metro.

Dumalagudog ti barukongko. Apo San Esteban, tarabayenyo koma ‘toy kanagnaganyo. Paatrasen ti inna panaglakay.

Insiwet ti patarayna. Kasla mapisang ti tambotso iti panangpikarna iti motorsiklo. Tinakderanna ti motorsiklo idi agarup lima a metro laengen ti kaadayona iti andamio. Ngem idi addan iti tapaw, nagreggaay ti pempen. Dina nabalanse ti bagina ket nagluludonen ti tao, motorsiklo ken garami.

Tinarayko nga inarayat. Agan-anikki iti nakaipuruakanna. Uray la ikukotna ti asugna. No saan la a nakahelmet, sigurado nga agtaraken iti dugol. Binatakko. Agar-arukong nga inturongko iti pempen. Inyiladna. Inyunnatna dagiti takiagnaken sakana.

“Nablokay sa metten, ‘liteg?”

“Saan, balong, kumporme laeng met a, ti panagulog iti motorsiklo,” nagkatawa ngem nasuprak. Nakudkodko la ket ngarud ti di met nagatel a tuktokko.

ITI KADARATAN ti simmaruno a nagpraktisanna. Kasla agsandstorm ti pamay-anna iti igid ti karayan. Pasaray agpasikig. Kanayon a matumba ngem dina iginggina.

“Nagpinget ket ni Iban Kilabbanen, aya, apo,” kinuna ni Mang Siyyong Bulding nga agpaspastor iti urbonan a baka iti sirok ti narukbos a mansanita a mangbuybuya ken ni uliteg.

Iti naminsan a panagkamali ni uliteg iti teppang, nagsinadan iti motorsiklo. Naikarangukong ti motorsiklo iti remmeng dagiti kandaruma, naitapuak met ni uliteg iti karayan.

Tinarayko. Amangan ket no iti rama ti nakaikarangukonganna. Numona ket pasig a sanga ti kamantiris dagiti pandag. Sigurado la ketdi a mabunubonan iti siit. Namak payen no iti puser ti nagtupakanna? Yad-adayom, Apo!

“‘Pay, kuaenyon, ‘liteg?” Iti rama nga agpayso ti nakaikarangukonganna. Adu ti garumiad iti rupana. Naimbag ta nakadiaket iti maong. No saan, nabunubonan la ketdi dagiti takiagna iti siit.

“Makadigdigosak! Umayka ketdin, balong, ta agkammelta!” kunana pay laeng ket napangangaak la ket ngarud a nangtaliaw ken ni Mang Siyyong nga aggargarakgak a mangitudtudo ken ni uliteg.

AGNGADALEN ni uliteg iti bartekna iti dayta a sumipnget. Ngem sige pay laeng ti lastogna. Sigurado kano nga adda yalatna a premio iti 5thOpen Motocross inton piestami, tallo pay nga aldaw manipud ita. Dagiti traysikelan a taga- San Antonio, Nanguneg ken San Pedro ti kasanggana iti parkingan iti ili.

Nataliawmi ti dua nga agpalpalagto iti motorsiklo kadagiti buntuon dagiti darat ken bato iti abay ti kamada ti tabla ken landok. Dinayawmi ti ar-aramiden dagiti dua a kutokuto iti motocross.

“Haya me’ ti hek-elko, a, yor,” ingngadal ni uliteg ket pinaburbornan ti motorsiklona. Inatipak ngem rinungiitannakami.

Pinanggepna a pasang-atan ti kangatuan a buntuon dagiti bato, ngem saanna a natimbeng ti nagpalig a motorsilo. Naikarangukong iti kamada dagiti landok. Imkis dagiti nakakita.

ADDAN iti opsital ni uliteg idi makapuot. Bambantayak.

“Nasakit ti sellangko, baket,” inyasug ni uliteg idi dumteng ni ikit. Agalenna dagiti parte ti bagina a natudok iti landok.

“Gunggonam!” indil-ag ni ikit. “Tadtadekto pay la ket ta kuam ta yappankot’ paltat!”

Saan a nakatimek ni uliteg. Aglalo ngatan no ipadamagko a binalsigen ni ikit ti motorsiklona sana inlako iti por kilo kadagiti aggatgatang iti landok. ##

Comments are closed.