Footer

Pamilia ti konsehal: P50,000 gunggona para pannakatiliw 2 naglibas a balud

SALCEDO, Ilocos Sur – Nangitanggaya ti pamilia ti biktima ti pammapatay iti maysa a konsehal iti P50,000 a gunggona para iti madagdagus a pannakatiliw dagiti dua a naglibas a balud ditoy itay nabiit.

Kinuna ti maysa kadagiti anak ti konsehal nga adda buteng ken danagda iti pannakalibas dagiti akusado amangan no isuda ti isublat dagitoy a dangran isut gapuna nga intanggayada ti P50,000 gunggona iti asinoman a makaited iti impormasion para iti madagdagus a pannakatiliw dagiti suspetsa.

Kanaig daytoy, imbilin ni Mayor Cherry Gironella kadagiti pannakabagi ti linteg iti madagdagus a pannakatiliw dagiti suspetsa.

Naglibas da Roland Gadun ti Caoayan, Bongabon, Mindoro ken ni Ricardo Aglibut Ligue, iti Amguid, Candon City, babaen ti panangputedda iti rehas iti likud a tawa ti pagbaludan a nakaipupokanda.

 Agpada dagiti dua nga akusado iti pannakapapatay ni Sangguniang Bayan Member Amado Bilaoen ken pannakadunor ti kaduana idi Oktubre itay napan a tawen.

Maipalagip a binagbagsol dagiti dua ti konsehal a puon ti nakatayanna ken nakadunoran ti common law wife daytoy.