Footer

Religious Parasite

Adda daydiay lalaki a kanayon a mapan agkararag iti simbaan. Iti maikasiam nga aldaw, adda manen iti simbaan ket kas iti sigud, inkarkararagna: “Apo, maikasiamen daytoy nga aldaw, marigatanak unayen. Tulongannak koma. Saankon a kabaelan ti kinarigat ti panagbiagko?” Kellaat a nagsao ni Jesucristo.

“Marigatankan iti panagbiagmo?”

“Kasta ngarud, Apo!”

“Kasano a dika marigatan ket saanka met nga agsapul iti pagbiagmo! Dika man la agbirok iti trabahom!”

Di nakatimek ti lalaki.

“Ania ti kayatmo nga aramidek? Ibagamon.”

“Pangabakennak koma iti lotto, Apo!”

“Kasano a mangabakka ket dika met agtaytaya!”

Maysa daytoy nga inaangaw a sarsarita iti ubet ti baso ken iti tungtongan a pangpalabsan iti oras. Ngem adda kaimudinganna iti biag. No maminsan, adda dayta panamati ken panagtalek. Ngem agkurang dayta ket ditay mapnek isu nga agsapultayo pay iti ad-adu wenno pammaneknek.

Kastoy ti biag kristiano. Wen, pudno, kristianotayo, mamatitayo ken agtalektatayo ken Jesucristo. Ngem umanay kadi daytoy a panagtalek ken panamati? Umno kadi a kiddawentayo amin a kasapulantayo ken Cristo?

Ni Marielle, estudiante iti catholic school.  Happy-go-lucky nga estudiante.

“Apay a dika agrebio?” kuna ni nanangna.

“Adda sekretok tapno makapasaak!” inlastog pay ni Marielle.

“Ania dayta a sekretom, ibagam man kadakami!” kuna ni tatangna.

“Agkodigo ngata a!” inkatiaw ni adingna a lalaki.

“Oy, saan ania!”

“Agsipit ngata a ti test paper!” binagi ti adingenna a babai.

“Adda mangited kenkuana iti final coaching! Leakage! Leakage! Leakage!” kantiaw ni Manongna.

“Oy, saan laeng ania!”

“Ket ania ngarud!”

“Basta secret!”

Nakapasa ni Marielle uray saan a nagrebio.  Masmasdaaw pay ketdin dagiti klasmetna. Kasano a nakapasa ti saan nga agrebio?

Nagturpos ni Marielle. Saan latta a nagrebio para iti Licensure Examination for Teachers. Nagtest. Ngem awan ti naganna iti listaan dagiti nakapasa. Saan a nagkurri ti sekretona.

Nagliday unay ni Marielle. Kasta met dagiti nagannak kenkuana ken kakabsatna. Pinalutpotda. Apay a saan a nagkurri ti ibagbagana a sekretona?

“Inkararagko a makaruarak idi, nakaruarak. Ita a board exam, inkararagko manen a makaruarak, apay a saanen a napasamak?” insaibbek piman ni Marielle.

Kinatawaan la ket ngarud dagiti dadakkel ken  kakabsatna.

“Anak, maysaka gayam a religious parasite!” kuna ti amana. “Saan a rumbeng dayta. No kayatmo ti makaruar iti eksaminasion, nasken nga agrebioka. No kayatmo ti mangan iti innapuy, nasken nga agisaangka, aggaoka,” impatigmaan ti ama.

“Nasa Diyos ang awa, nasa tao ang gawa!” inkuros dagiti kakabsatna.

Religious parasite. Adu ti kas ken ni Marielle a religious parasite. Kararag a kararag, kiddaw a kiddaw ngem dina met buyogan iti aramid. Kas iti sarsarita, agkiddaw ti lalaki a mangabak koma iti lotto ngem di met gumatgatang iti tiket, kasano a mangabak?

A, nagadu ketdin dagiti religious parasite. Iti Domingo, nakitam ni gayyem wenno  kaarrubam a nakaporma a bigbigat, siempre, damagem no sadino ti papananna.

“Innak makimisa tapno mapakawan ti basolko” wenno “Makimisaak met tapno maksayan ti basolko,” isungbatna.

Ngem kalpasan ti misa, agsubli manen iti panagbasol.  Innanto manen ipakawan iti sumuno a Domingo. Kasta a kasta.

Maawagan met a religious parasite dagita. Agkidddaw iti pammakawan ngem agaramid met laeng iti basol santo manen agpakawan.

Iti gobierno, adu met ti religious parasite. Uray no maikamkampania ti kontra red tape, agtultuloy latta. Uray no nainget ti “Mamamayan muna, bago mamaya” a kampania ti serbisio sibil, narebisar ketdi a kastoy: “Mamamayan muna, bago mamaya, kung magbabayad siya.” Red tape!

Iti ebanghelio itay  Domingo, Enero 14, ket maipapan iti kaunaan a milagro nga inaramid ni Jesucristo. Pinagbalinna a naimas nga arak ti binurnay a danum iti maysa a kallaysa sadiay Cana. Impakitana ti dayagna sadiay ket namati kenkuana dagiti adalanna.

Iti agdama a panawen, datayo a kristiano ti disipulos ni Jesucristo. Mamatitayo kenkuana. Agtalektayo kenkuana, isu a no dadduma agkiddawtayo iti saan nga umno. Agkiddawtayo iti para iti bukodtayo a pagimbagan laeng. Agkiddawtayo ngem ditay met tulongan ti bagitayo. Namati dagiti adalanna. Namatitayo. Ngem saan nga umanay dayta a panamati. Apay, saan kadi pay nga umanay a milagro ti kinasalun-atmo nga agbibiag ken awanan iti an-annayen? Saan kadi a milagro a mangmanganka iti nalabon idinto ta adu dagiti mabisbisinan? Saan kadi nga umanay a kadennam dagiti dadakkelmo idinto ta nagadu ti narakrak a pamilia? Saan kadi nga umanay a maaddaan amin a kasapulam idinto ta adu ti maaw-awanan? Saan kadi milagro ta makaeskuelaka idinto nga adu ti saan a makaeskuela? Saan kadi a milagro a sibibiagka iti kappia idinto nga iti sabali a lugar ket madama ti angol, sakit, gubat, inhustisia, bisin, waw, tuok ken kinaranggas?  A, adu pay! Saan nga umanay ti espasio no isurattayo amin.

Adda kadatayo ti dayag ken milagro. Ngem agsipud ta ditay mapnek, agkiddawtayo iti ad-adu. Agsipud ta nalaklaka ti agkararag ken agkiddaw isu a saantayon nga agtrabaho. Uray agbasolka wenno agaramidka iti basol, nalaka laeng dayta ta ipakawanmo manen no Domingo. Religious parasite ti kastoy a kristiano.

Itoy a baro a tawen, panawenen a mangabaruanan ken agbalbaliw.