Footer

Sayang laeng ti buis dagiti umili

Iti nagsasaruno nga entrance test, nakakadkadlaw ti nakadakdakkel la unay a bilang dagiti examinees iti Philippine Military Academy. Iti umuna a panagkita, makuna nga ad-adu itan ti agtarigagay a sumrek iti PMA tapno agserbida iti pagilian. Wenno iti sabali a panirigan, agbalbalinen ti PMA a dakkel a rangtay para iti iseserrek dagiti agturpos kadagiti high-paying jobs kalpasan iti mandatory a serbisioda iti pagilian.

Itay laeng napan a tawen, 55 a beterano a kameng ti air force ti immikkat iti trabahoda. Adda pay dagiti sumagmamano a nag-AWOL tapno sumrekda laeng kadagiti commercial airlines. Graduado iti PMA dagita a kameng ti air force. Pinagadal ken sinuelduan ti gobierno. Agdagup iti P2 million ti mabusbos ti gobierno tunggal kadete agingga iti agturposda.

Bassit daytoy no ikumpara iti dakkel a bilang ti air force iti agdama. Ngem no amirisen a nalaing, mabayag, adu a panawen ti mabusbos tapno agbalin nga eksperto a piloto dagiti nagikkat iti puestoda. Saan a nalaka ti mangpataud ken mangsursuro iti kasta a kaadu.

Apay a napasamak daytoy? Nababa a sueldo. Agsueldo laeng dagitoy nga air force captain iti P17,000.00 iti binulan idinto nga agsueldo dagiti kapadada iti commercial air lines iti P80,000.00 agingga iti P150,000.00 iti binulan.

Iti India, nagkasapulan iti 10,000 a piloto ken 4,000 met ti China iti 2006. Dagiti air force captain ti AFP nga agmanmaneho kadagiti C130 cargo ket kabaelanda metten ti agpatayab kadagiti dadakkel nga airbus, kas iti Airbus 320 ken 340 ken ti Boeing 747.

Agsipud ta walo laeng a tawen ti mandatory service dagitoy a nagraduar iti PMA nga air force, mabalindan ti agretiro kalpasanna ket sumrekdan iti commercial air lines. Daytoy ti maysa a rason no apay a maikadua a kaadduan kadagiti agraduar iti academia ti sumrek iti air force.

Itoy a kaso, di pay nasubbot ti pinagadal dagitoy manipud iti buis dagiti umili. Napukawan pay ti gobierno kadagiti eksperto iti air lines.

Nalukay unay ti implementasion kadagiti paglintegan iti organisasion ti AFP. Nasken a marebisa ken mabalbaliwan daytoy iti kabiitan a panawen. Ta no utoben a nalaing, kasla ginundawayan laeng dagiti nagadal iti PMA dagiti benepisio a maragpatda ditoy tapno makasagpatda iti nangatngato nga agpang ti trabaho.

Bassit unay dayta walo a tawen a mandatory service dagiti agraduar. Arigna iti dayta a panawen ti panangalada iti kinaekspertoda ket kalpasan a makasursuroda a nalaing, agikkatda metten iti serbisio.

Sayang laeng ti P2 million a binusbosda manipud iti buis dagiti umili.

Iti masakbayan, saanto laengen a dagiti eksperto a kameng ti air force ti agpanaw no di pay dagiti kameng ti Philippine Navy a sumrek met kadagiti commercial shipping lines. Ta dagiti kapitan ti barko ti AFP ket kualipikadoda metten nga agiggem kadagiti dadakkel a luxury ships, tanker ken pampasahero a barko dagiti commercial shipping lines.

Pagdaksanna, saan a ti gobierno ti agsagaba iti nakaro no di dagiti umili nga agbaybayad iti nakangatngato la unay a buis.