Footer

Avila: Awan bilegko a manggaraw maaprobaran iti city council

VIGAN CITY – “… Awatekto ket sungbatak,” kinuna ni Sangguniang Panlungsod secretary Jayson Avila mainaig iti maiwayat nga inbestigasion iti kontrobersia a pinarnuay ti pannakaipatulod iti opisina ti ehekutibo ti saan a naaprobaran a baro a revenue code.

Gapu iti daytoy, ngimmato unay ti computation ti baro a rate ti business taxes a puon ti nagreklamuan dagiti negosiante nga immuna a nagbayad iti buisda.

Kinuna ni Avila a “diak inamin a biddutko wenno kamalik… daydiay ngamin nai-forward iti office of the city mayor, isu talaga ti proposed (taxes)” idinto nga inyunay-unayna nga “awan ti bilegko nga aggaraw, agsukat iti maaprobaran iti city council ta sekretarioak laeng”.

Segun ken ni Avila, iti babaen ti nasao a singasing, agpangato ti taxes, fees ken charges iti 50%.

Inlawlawag ni Avila a babaen ti Local Government Code, adda graduated taxes ti munisipio ngem adda met probisionna a no siudad, mabalin a ngumato iti minimum a 50% agingga iti kangatuan a 75%.

“Naiproposed daydiay fees and taxes… nagpangato ta daydiay met ti talaga a kolektaen koma ti siudad,” kinunana.

Ngem segun ken ni Avila, iti katengngaan ti public hearing iti revenue code, napigsa ti oposision dagiti pasdek negosio ta dida kayat a ngumato ti taxes.

“Trinatarda as it is, ngem gapu ta saan a kayat ti business nga agpangato (ti taxes), isu nga as it is.”

“Awan ti binalbaliwak, as proposed iti first reading, daydiayen ti nakasalpak (iti computer),” kinuna ti sekretario.

Kinuna ni Avila a para iti third reading, naikabilen ti revenue code iti laptop dagiti konsehal para iti panangrebioda.

Kinuna pay a naipapirma ti revenue code para iti pannakarebiona kadagiti konsehal, sa ni Vice Mayor Ranches, sa naitransmit iti opisina ti mayor para iti panangrebioda met.”

Dinakamat ni Avila nga adda idi kuestion no apay a nangato unay ti graduated tax idi naipatuloden ti revenue code iti opisina ti mayor.

Nupay kasta, dina imbaga no naikkan iti atension ti nasao a kuestion.

Kinuna ni Avila a “rigatna ngamin ket naipatungpal diay gross income(na) ti maysa a negosiante, naipatungpal metten ti baro a revenue code ket nagepekto laeng (daytoy) iti Enero.”

Inlawlawag ni Avila a gapu ta itay laeng Enero ti panagepekto ti revenue code, maipakat koma ti graduated tax inton 2008.

Kinuna ni Avila a dina “dibdiben” no di ket agtrabaho latta uray adda pormal nga inbestigasion maikontra kenkuana.

“Ipakatko ti kalaingantayo, saan a dagita ti mangdadael iti serbisio,” nakunana.