Footer

Chavit, inyendorso dagiti LPP para senador

Kas panangipaneknekda iti pumigpigsa nga inpluensiada iti nailian a politika, inyendorso dagiti gobernador ken mayor ti kandidatura para senador ni Ilocos Sur Governor Luis “Chavit” Singson.

Sangsangkamaysa dagiti 82 a miembro ti League of Provinces of the Philippines (LPP) a nangiyendorso iti panagkandidato ni Singson para senador iti babaen ti partido ti administrasion bayat ti mitingda itay Enero 12.

Kanaig daytoy, imbatad ni Singson bayat ti interbiona iti lokal nga estasion ti radio ti panagyamanna kadagiti amin a gobernador iti Pilipinas iti panangiyendorsoda kenkuana para senador.

Segun iti gobernador, daytoy ti umuna a gundaway nga adda inyendorso dagiti gobernador a padada a provincial executive a kandidatoda para senador.

Kinuna ni Gov. ti Eastern Samar Ben Evardone a naipamatmatda ti bilegda a lokal nga opisial ti gobierno iti panangtulongda ken ni Pres. Arroyo bayat ti krisis ti politika ket kayatda nga ipakita iti eleksion a kabaelan dagiti gobernador ken mayor ti agbalin a kingmaker iti panangikampaniada iti kabaddungalanda iti eleksion para senador.

Kabayatanna, imbatad ti Malakaniang ti interesna a mangala ken ni Singson kas kandidatona para senador.

“Ikuyog ni Gov. Singson ti atiddog ken nabaknang no di man namaris a padas iti lokal a panangituray a mabalin a pagtaudan iti napateg a punto ti reperensia para iti lehislatibo a deliberasion ken tignay iti Senado,” kinuna ni Presidential Adviser on Political Affairs Gabriel Claudio.

Innayon ni Claudio nga agbalin a signipikante nga asset ni Singson iti Senado idinto nga inannugotna ti dakkel nga akem ti local government units iti administrasion Arroyo.

Nupay kasta, kinuna ni Singson a nupay inwenna,  inyunay-unayna a “no adda sabali a maisullat, isullatda latta” ta kaykayatna ti agsubli a para gobernador.

“Kinunak a no adda sabali, libreyo latta nga alaen ta agsubliak met la a gobernador,” kinuna ni Singson.

“Kayatko a mairugi ti industrialisasion ti probinsia antes a pumanawak a gobernador,” kinuna ni Singson.

Innayon ti gobernador a kaykayatna ti agserbi iti probinsia agingga a saanna a makita a masemento ti tagtagainepna a maaddaan ti Ilocos Sur iti adu a paktoria.