Footer

Polis, tanod, manayonan iti pagkarnabalan

VIGAN CITY – Kinuna ni Mayor Ferdinand C. Medina a kasapulan ti naing-inget a police visibility tapno malapdan dagiti dakes a mapasamak nangruna iti panangrambak daytoy a siudad iti piesta ni San Pablo.

Daytoy ti reaksion ti mayor kalpasan a naidanon kenkuana ti sumagmamano a reklamo iti panagagaw iti bag ditoy itay nabiit.

Kaudian ti pannakadukot iti petaka ti maysa a lalaki iti sanguanan ti pagkarnabalan babaen ti di pay nabigbig a nakamotor a lalaki.

“Masapul nga agdouble time dagiti polis tapno malapdan dagiti panag-snatch iti bag,” kinuna ni Medina idinto nga innayonna a kasapulan ti kanayonan a polis, barangay tanod ken dagiti NGOs tapno tumulongda iti pannakatagiben iti urnos ken talna iti siudad.

“No agpiesta ti Vigan, adu dagiti tattao nga um-umay ditoy isu a masapul nga agnayontayo iti kapolisan,” kinuna ti mayor.

Mainaig dagiti lugan iti pagkarnabalan, kinuna ni Medina a masapul a safe dagitoy a pagluganan agsipud ta dina kayat a maaramid iti siudad ti napasamak a trahedia idiay Marikina a timmayab ti lugan nga Octopus.

Kinunana nga apaman a naipatakder dagiti rides, imbaonna dagiti inhiniero manipud iti city engineer’s office ken environment office ken maysa a civil engineer tapno tsek-apenda dagiti lugan.

“Saantayo a kayat a kabayatan ti festivities, adda dakes a mapasamak,” kinuna ni Medina.

Imbilin pay ni Medina iti general services office iti pannakadalus iti aglawlaw ti carnival grounds.

“Nagnayonda iti uppat nga emerhensia a para dalus ngem panagkitak ket agkurang, baka agnayontayo iti uppat pay tapno nadalus latta iti aglawlaw ti pagkarnabalan,” kinuna ti Mayor.

“Kitkitaentayo ti seguridad iti carnival grounds ken parking area ken iti peace and order,” impatalged ni Medina.

Comments are closed.