Footer

Ranches: Responsibilidad ti sekretario a sertipikaran kinapudno ti dokumento

VIGAN CITY – Kinuna ni Vice Mayor Franz Ranches a responsibilidad ti sekretario ti sangguniang panlungsod ditoy a sertipikaran ti kinapudno ti dokumento nga idungsona kadagiti miembro ti konseho ditoy siudad.

“…Kitaen ti sekretario a dagidiay naaprobaran ti city council ket isu ti aktual a rummuar a dokumento ket dayta ti responsibilidad ti sekretario,” kinuna ni Ranches idinto nga inyunay-unayna a “saanmo a maekspektar dagiti members ti city council nga isuda ti mangkuto iti voluminous documents ta nangnangruna a trabaho(da) ti mangpanunot, mangdebate.”

Sumagmamano nga aldaw kalpasan ti panangrugi ti panagbabayad iti buis, nagreklamo dagiti negosiante ditoy gapu iti adu unay a ngimmatuan ti bayadanda a business taxes no maidilig itay napan a tawen.

Intudo ti opisina ti ehekutibo ti konseho ti Vigan a yan ti biddut agsipud ta saan a ti naaprobaran a revenue code ti naipatulod kadakuada a nangibasaranda iti computation iti bayadan iti lisensia.

Ngem kinuna ni Ranches a masapul nga adda tao a responsible iti napasamak.

“… No adda mistake, adda correction of mistake, nakorehiren, awan problema (didiayen) ngem masapul nga adda tao a responsible,” impaganetget ti bise mayor.

Kinuna pay ni Ranches a ni Avila ti mangas-asikaso no ania ti maikabil iti laptop ket responsibilidadna nga ikabil ti pudno ket no mangi-feed iti wrong data, “error dayta, lapse dayta, panaglabsing dayta iti biang ti sekretario.”

Kinuna ni Ranches a personal a nagpatangda iti konprontasion iti sekretario ket inako daytoy nga “honest mistakena”.

“Masdaawtayo no apay a nagpainterbio a sabali met ti ibagbaganan,” kinuna ti bise mayor idinto nga innayonna a kayatna nga ilinteg ti rekord a kas maibasar iti minutes ti session a sinertipikaran a mismo ni Avila no sadino a nakalanad nga inlawlawag ni Konsehal Loreto Quibilan no ania dagiti items wenno probiso a ngumatuan ti taxes.

“Naidentify a ti laeng ngumatuan ti buis dagitoy a negosio, excise taxes on tobacco operation, operation of cockpit, operation of banks, financial institutions, printing and publication, franchise tax,” kinuna ni Ranches.

Kinuna ni Ranches a dagitoy laeng ti apektado nga area a ngumatuan ti buis ket “technically speaking, agepekto(da) inton 2008.”

Kinuna ni Ranches nga iti minutes ti meeting, nailanad a kiniddawna ken ni Quibilan no ania ti sakupen ti baro a revenue code ti siudad ti Vigan.

“It was very clear, nakalawlawag,” inyunay-unay ni Ranches.

Kinuna pay ni Ranches a “no kayatna (Avila) a protektaran wenno dependaran ti bagina, saan koma a babaen ti expense ti maysa nga institusion kas iti siudad ti Vigan agsipud ta ‘unprofessional’ daytoy.”

“Ngem saan a madanagan ni Apo sekretario ta ikkantayo iti due process no ma-impose ti disciplinary action,” impatalged ti bise mayor.

Comments are closed.