Footer

Gambling buddy ni Erap kinumpirmana P130-M tobacco excise tax kickback

Isubli ni Charlie “Atong” Ang ti P25 milion nga innalana iti P130 milion manipud iti bingay ti Ilocos Sur iti tobacco excise tax kas paset ti plea bargain iti Sandiganbayan tapno nalaglag-an ti pannusana.

Kanaig daytoy, kinuna ni Gov. Luis “Chavit” Singson nga agyaman unay ta “nakonsensia ni Atong Ang (ket) imbagana ti pudno.”

“Nupay saan a masapulen (Ang) iti kaso, at least, ammo ti tattao ken judges a husto ti sinasaok,” kinuna ni Singson.

Iti sangsanguenna a kaso a plunder, posible a masentensiaan ni Ang iti 40 tawen a pannakabalud ngem iti babaen ti plea bargain, lumag-an ti pakaikasuanna a makedngan laeng iti innem a tawen a pannakabalud.

Bayat ti impeachment trial ni Estrada, nagtestigo ni Singson nga innala ti dati a gayyemna ti P130 milion manipud iti P170 milion a bingay ti probinsia manipud iti tobacco excise tax kas sagudayen ti RA 7171.

Alegasion ti gobernador nga inruar da Ang a kaduana dagiti tallo a babbai nga associatesna ti nasao a gatad ket indeliberda iti pagtaengan ni Estrada iti Polk Street, Greenhills, San Juan.

Mapapati nga inungtan ni Estrada ni Ang kalpasan a naammuanna iti gobernador a P70 milion laeng ti naited kenkuana idinto a P20 milion ti napan ken ni First Lady “Loi” Ejercito Estrada; P15 milion ken ni Mayor Jinggoy Estrada ken P25 milion ti innala ni Ang.

Pinaglibakan dagiti Estrada ti alegasion ni Singson.

“…Idi pay, kayat ni Atong ti agtestigo idiay Amerika ngem saanka a masapulen, kinunak, ta napigsa met diay kason,” inlawlawag ni Singson.

Kinuna ni Singson a narigat a mawarwar ni Estrada ti testimonia ni Clarissa Ocampo a nakitana ti Presidente a nagpirma iti nasao nga account kas Jose Velarde.

Kas paset pay ti plea bargain, immannugot ni Ang nga ikkatenna amin a kalintegan ken interesna iti balayna iti No. 18 Manansala St., Corinthian Garden, Quezon City tapno maisublina ti P25 milion iti gobierno.

Comments are closed.