Footer

Negosiante a biktima iti polis: pudno a napasamak ti panaghold-ap

STA. MARIA, Ilocos Sur – Impetteng ti negosiante a mapapati a biktima iti panaghold-ap a pudno ti napasamak kenkuana iti sanguanan ti panagduadua ti polis iti deklarasionna.

“Diak ul-ulboden ti bagik. Diay la pudno ti ibagbagak,” makasangsangit nga impetteng ni Michelle Escobar, 29, naasawaan, residente iti Baliw Laud ditoy kas reaksionna iti naipatangatang iti radioi a panagduadua ti polis iti immuna a palawagna mainaig iti pannakahold-apna itay Enero 17.

Nagpulong ni Escobar iti San Juan, La Union police a hinold-ap ti maysa a lalaki ket intaray daytoy ti P750,000 a kuartana. Sabali laeng ti deklarasionna iti Bacnotan police ken iti Narvacan police station.

Pagbayad koma ni Escobar kas down payment iti ginatangna a balay ken lote ti nasao a gatad.

Ngem iti interbio ti media ken ni Chief of Police ti Narvacan Police Marlo Castillo, impeksana ti panagduaduana a napasamak ti panaghold-ap.

Kinuna ni Castillo a di la nadlawen ni Escobar ti simrek a tao iti kotsena.

Maysa pay a dinillaw ni Castillo nga iti baet a nagadu ti checkpoints ken madalanan a police stations iti national highway, di man la nagpaarayat ni Escobar.

Ngem kinuna ni Escobar nga “iti daydiay a kanito, diay dua nga annakko ti simrek iti panunotko” isu a sinurotna dagiti pammilin ti hold-aper.

Segun iti biktima, agturongen iti San Jose, Narvacan, kuyogna ti P750,000 a pagbayadna ngem idi addan iti San Antonio, Narvacan, nadlawna nga adda diperensia ti luganna ket impaigidna, bimmaba sana sinirip ti sirok ti lugan.

“Idi agsubliak iti uneg ti luganko, adda met taon… pinaturongannak iti paltog isu a diak nakapalag,” kinuna ni Escobar.

Kinuna ni Escobar a dina nailasin ti lalaki ta nakabonete ken nakadiaket iti nangisit. Tagalog ti pannakipatang ti hold-aper.

Kinuna ti biktima nga imbilin ti lalaki nga ibueltana ti lugan ket nagdaliasatda agingga iti San Juan, La Union.

Kalpasanna, nagturongda iti Bacnotan ket pinaiserrek ti suspetsa ti lugan iti bakante a lote. Pinaibuelta ti hold-aper ti lugan ket pinaipaigidna iti kalsada.

“Idi kuan, addan nakamotor a nangala kenkuana. Nagsublida a nagpaamianan,” kinuna ni Escobar.

Ngem kinuna ni Castillo a nagsupadi ti deklarasion ken palawag ni Escobar mainaig iti nanghold-ap kenkuana. Iti blotter ti polis, nailanad a maysa a babai ken lalaki dagiti hold-aper.

Ngem kinuna ni Escobar a lalaki laeng ti imbagana a nanghold-ap kenkuana idinto a nadakamatna a babai a naglugan iti motorsiklo ti nangsukon iti lalaki idi addadan iti Bacnotan, La Union.

Comments are closed.