Footer

Polis a suspetsa iti pammapatay, naidatag iti PPO

CAMP ELPIDIO QUIRINO, Bantay, Ilocos Sur – Naipaiman iti provincial police office ti polis a suspetsa iti pannakapapatay iti agama iti Narvacan, Ilocos Sur babaen ti pammilin ti provincial director ditoy.

Indatag ti Narvacan PNP iti PPO ni PO2 Basiliso Cabunoc, kameng ti police force iti nasao nga ili, agraman ti paltog a nayisio kenkuana.

Sakbayna, imbilin ni Provincial Director P/Sr. Supt. George Regis nga idatag ti Narvacan PNP ni Cabunoc kalpasan a nabigbig ti polis a mapapati a nangpaltog iti agama a Diata iti pagtaenganda iti rabii ti Enero 15.

Napapatay da Quirino Diata, 40, ken ti anakna a ni Angelo, 3, bayat ti pannaturogda iti pagtaenganda iti Dinalaoan, Narvacan, Ilocos Sur a mapapati nga insayangkat ni Cabunoc ken ti kaduana a nainaganan nga Edilberto Busto, residente met laeng iti nasao a lugar.

Imbilin pay ti direktor a maisubmite ti tallo a kapsula manipud iti cal. 45 a narekobre dagiti inbestigador iti nakapasamakan ti krimen para iti ballistic tests.

Naipilan ti kaso a double murder maikontra iti polis ken kaduana.

Comments are closed.