Footer

2 polis nakapalibas iti balud, naipilaan iti kaso

SALCEDO, Ilocos Sur – Gapu iti pannakapalibasda iti aywanda a balud, dua a polis ti naipilaan iti kaso iti provincial prosecutors’ office itay nabiit.

Nakasuan iti infidelity in the custody of prisoners iti piskalia da SPO2 Nestor Garcia ken SPO1 Edwin, Rigor, agpada a kameng ti PNP ditoy.

Maipalagip nga idi parbangon ti Enero 5 daytoy a tawen, naglibas iti pagbaludan da Roland Gadun, taga Caoayan, Bongabon, Mindoro, ken ni Ricardo Aglibut Ligue, agnaed iti Amguid, Candon City babaen ti panangputedda iti rehas ti likud a tawa ti nakaipupokanda.

Akusado dagiti dua iti murder ken frustrated murder gapu iti pannakapapatay ni Sangguniang Bayan Member Amado Bilaoen ken pannakadunor ti kaduana idi Oktubre itay napan a tawen.

Segun iti inbestigasion, binagbagsol dagiti akusado ti konsehal a puon ti nakatayanna ken nakadunoran ti common law wife daytoy.

Nangitanggaya ti pamilia ti konsehal iti P50,000 a gunggona para iti madagdagus a pannakatiliw dagiti naglibas a balud.

Kinuna ti maysa kadagiti anak ti konsehal nga amkenda nga isuda ti isublat a dangran  dagiti akusado isu nga intanggayada ti P50,000 a gunggona iti asinoman a makaited iti impormasion para iti pannakatiliw dagitoy.

Comments are closed.