Footer

Agluluaka, Alicia (Maikadua a paset)

NAGPATNGA dagiti uleg iti tengnga ti dua nga agpa a lipit a salogan ken sang-atan iti waig. Lipit a kungkong nga aguneg iti nasurok a dua katao. Nakangato ti ulo ti maysa kadakuada a kunam la no sidadaan a tumukkaw; ket iti likudan daytoy, nakakul-ob ti maysa pay a kobra nga agtirtiritir a kunam la no marigatan. Kadagiti teppang ti lipit, naguyaoy ti ad-adu pay nga uleg.

HISSSSS! HIIISSS! Nainayad ti uyas ti dakkel a kobra nga agturong kenka, ket iti agsumbangir a teppang, mangrugin nga agtinnag iti salogan dagiti dadduma pay nga uleg.

 Inibbatam, Alicia ti basket ket impennekmon ti nagtaray a nagsubli iti waig. Nanglikawka.

“NI MANANG ALICIA! Daradara ni Manang Alicia!” nangngegmo ti pukkaw ni Bitoy nga agtawen ngata iti pito a nakakita kenka nga agas-asug iti sirok ti lanuti iti babaen ti purok. Nakitam nga uray la pagduaan ken ilagto ti payapay ken pukkaw ti ubing kadagiti lima a babbaro a nakatugaw iti papag iti sirok ti sarguelas iti sanguanan ti kalapaw da Lando. Nakitam a nagtataray dagiti lallaki a sumalog kadagiti tinukad a bangkag.

“Ania ti napasamak?” ni Lando ti kaunaan a nakagteng.

“Aganakak san…”

“Ipantayon idiay balayda!”

“Ayabanyo ni Apong Chelong!”

Sinakruynaka ni Lando ket nariknam, Alicia, ti tibker dagiti piskel dagiti takiag ti baro. Nabayog ken natibker a barukong, barukong a saan laengen a namnaminsan a napadasam metten a nagsadagan. Nariknam ti panangilala ken panangigigir ti baro kenka. Naangotmo ti pay-od a nangbaklay iti ngayed ken kappia ti kabambantayan ti Kayapa. Ngem dimo maperreng, Alicia, dagiti madanagan a mata ti baro: marunawka, Alicia, marunawka…

MARUNAWKA  kadagiti agbalbalikas a mata ni Agapito Sandoval nga amom. Kasla maal-alino a mangmatmatmat iti pakabuklam, Alicia.   Lalo ita a malem a duduakayo iti balay. Dagiti mata a kasla agal-alunos, a kasla nabisinan.

Ngem dimo inkaskaso ti amom, Alicia, nupay inaponannaka met iti kebbakebba. Pilit nga isekseksekmo iti isipmo a saan ngata a maaramid ti amom a lalaki ti saan a nasayaat. Napintas ti asawa daytoy a mangimaton iti negosioda.

“Isabela ti apiliedom?”

“Wen, manong.”

“Adda nobiomon?”

“Adda idiay probinsiami, manong?”

Nagtungtung-ed ti amom. Kasla agpampanunot iti nauneg. Sa manen kasla mangal-alunos ti panangkitana iti napudaw ken nawasnay a lakkom, Alicia, sa limneken iti nganga ti ridaw.

Timmayok ti isipmo sadiay probinsia.

“Annay!” Dimo naannadan a naiwa ti kannigid a tammudom bayat ti panagiwam iti sibuyas. Kellaat a nagbayo dagiti barukongmo iti pannakakitam iti tammudom a daradara, daradara…!

“DARADARA ni Alicia…!” impukkaw ni Lando a napartak dagiti askawna.

“Lando…” kunam laeng iti nakapsut, ngem dimo naibalikas ti pakawanennak koma. Awan ti turedmo a mangiyebkas kadayta a balikas.

Kaayan-ayatmo ni Lando. Saannaka idi a palubosan a mapan idiay Manila tapno sumrek a katulong. Ngem inrasonmo  nga agsublinto met laeng. Mapanka sadiay Manila a mangged. Ken agurnong. Nagsublika nga agpayso ngem masikogkan.

Indissonaka ni Lando iti papag a kawayan iti sipi.

Maarakattot ti inam. Madanagan. Lalo a nariknam ti sugat iti kinataom.

“Kunakto pay ngamin a dika mapan!”

“Dagidiay agassawa a kobra a nangkagat ken daydi manong. Nakitak ida…”

Nagtitinnalliaw dagiti lallaki a simmurot kadakayo.

“Kinagatdaka?” kuna ti inam.

“Nakatarayak…”

“Nakakitaam?” kuna ni Lando.

“Idiay salogan dita waig.”

“Kakadua! Isaganayon dagiti eskopeta ken maloyo! Intayon!”

“Papananyo?” nagdamag ti ina ni Alicia.

“Patayenmi dagidiay a kobra!” kinuna ni Lando ket immirteng pay dagiti masel ti nasabang a pammagina iti tayagna a lima a kadapan ken pito a pulgada. Nagranekrek dagiti datar ken ti lima a pangal ti agdan iti panagdardaras dagiti lallaki.

“Saan! Diyo patayen ida! Lando, maasianka koma!”

“MAASIANKA koma. Awan basol dayta sikogmo iti napasamak kenka,” kuna ti baket a nangigawid kenka iti itatapuakmo koma iti rangtay iti naapres ken nauneg ken nakarugrugit a Karayan Pasig. “Agbutengka iti Dios, balasangko! Saan a dayta ti sungbat iti parikutmo!”

“Masikogak ket kayatkon ti matay,” nakunam iti nangigawid iti  imam. Tinaliawmo dagiti sumagmamano a tattao nga agus-usioso. Naganug-og ken nangapputka.

Nagdisso iti abagam ti narusanger ken kulbeten nga ima. Indumudommo ti ulom iti barukong ti baket idi awidennaka. Inkarkaromon ti naganug-og. Iti aglawlaw nangngegmo ti palakpak ken riaw. Riaw…

RIAW dagiti lallaki nga umad-adayo ti maalingagmo, Alicia. Nariknam ti sugat ti kinataom. Kayatmo nga igawid dagiti babbaro. Kayatmo iti bumangon a tumamdag iti tawa tapno pukkawam dagiti lallaki a dida patuloyen ti panggepda ngem nasakit unayen ti tianmo ken nariknam ti nabara a likido nga agayus iti puertam. Nagasugka.

Adda pay la kadi  panagayatmo ken ni Lando? Wen, mariknam daytoy. Uray ni Lando ket irengrengrengna pay laeng ti ayatna. Ngem dimo kayat, Alicia, nga awaten ti panagsinnubliannanyo. Mabainka iti sigud a kaayan-ayatmo.

Danapeg ti agdardaras a limmaem ti naalingagmo. Ti partera.

“Agidadangkan a, mari!” kinunana.

“Madaman!” timek ni inangmo iti kusina.

Iti panagpakusina ti partera, dagiti paningkiten a matam, Alicia, ti naisurot.

(Adda tuloyna)

Comments are closed.