Footer

Dinastia iti politika, peste ti pagilian

Iti daytoy nga eleksion napigpigsa manen dagiti pammaneknek nga iggem ti sumagmamano laeng a pamilia ti politika iti ili, siudad, probinsia ken iti sibubukel a pagilian.

Pagarigan laengen dagiti agngayangay a kandidato para senador. Kitaentayo dagiti sumaganad:

  • Agkandidato ni Mayor ti San Juan JV Ejercito iti baet nga agdama a senador ti kabsatna a ni Jinggoy Estrada. Isu kano ti sukat ni Senador Loi Ejercito a saanen nga agpailayon.
  • Ni Diputado Peter Allan Cayetano, kayatna nga agludonda nga agkabsat, ni Senadora Pia Cayetano, iti Senado. Sakbay a pimmusay, senador daydi amada.
  • Agkandidato met ni Aquilino “Coco” Pimentel III para senador. No mangabak, duadanton iti amana, ni Minority Leader Aquilino “Nene” Pimentel, Jr., a senador.
  • Agpada nga agkandidato a para senador da nag-Senador Tessie Aquino-Oreta ken ni Dip. Benigno “Noynoy” Aquino. Kabsat daydi nag-Senador Benigno “Ninoy” Aquino ni Aquino-Oreta idinto nga anakna ni Noynoy. Dakkel ti posibilidad nga agkaabay ti tugaw dagiti agikit iti Senado.

Kastoy met laeng ti mapaliiw a kasasaad ti politika kadagiti probinsia, siudad ken il-ili. Ditoy ti pakapatalgedan nga iggem ti maysa wenno dua laeng a pamilia ti politika iti lugarda.

Saanen a baro a damag a ti maysa a diputado, kabsatna wenno asideg a bagina ti gobernador, bise gobernador, bokal wenno mayor. Wenno saan, ti gobernador wenno mayor, bisena ti kabsatna, asawana wenno anakna. Di payen ammo dagiti kadawyan nga umili ti pangawagda kadakuada no dadduma gapu ta matikawda no ania ti tugtugawanda a puesto.

Kasta met a kapaliiwan a dagiti agturposen nga opisial ti probinsia wenno ili, agpababada iti puesto idinto nga ipasublatda ti puestoda iti kameng ti pamiliada sadanto agsubli iti dati a puestoda iti sumaruno a panagpipili. Rigodon ti puesto ken turay.

Kasta ti nakas-ang a kasasaad ti politika iti pagilian.

Dinastia iti politika ti awagda iti daytoy. Ngem kadagiti politiko, rumbeng laeng a preserbaen, salakniban ken papigsaen ti bukodda nga interes ken pagimbagan.. Nagbalinen ti puesto a kabukbukodanda, kukuada, monopoliada ken pagbagasan iti bileg ken inpluensia.

Iti napalabas, sumagmamano nga agilinlinteg ti nangipila iti gakat a mangpukaw iti daytoy agdadata a di panagpapatas iti gundaway a mabutosan ken mangituray iti tay-ak ti politika. Ngem nakaay-ay-ay a naipempen laeng iti Kamara, agkataptapokanen iti kabayagda iti pandag ken natay payen ti maysa kadagiti nangipila,daydi Diputado ti Laguna Magdaleno Palacol.

Kuna ti Artikulo II, Seksion 26 ti konstitusion a garantiaan ti Estado ti kaadda iti patas a gundaway para iti serbisio publiko ken ipawilna ti dinastia politika kas inladawan ti linteg.

Ngem inutil laeng daytoy a probiso ti konstitusion agsipud ta ipapaigid laeng dagiti agilinlinteg tapno di mapekka ken di makarsan ti bubon a pagsagsagrapanda iti kinabileg ken kinaturay.

Iti daytoy a senario, ditayo ngarud namnamaen a maipasa iti Kongreso dagiti nakapempen a gakat a kontra dinastia.

Kabayatanna, anusantayo dagitoy a politiko nga agbutbot iti tugaw bayat ti panagtakemda uray iti sanguanan ti kinapudno nga awananda iti kabaelan a mangidaulo ken mangimaton iti panagtaray ti gobierno iti lugarda ken iti pagilian.

Ay-ay pay dagiti umili! Ay-ay pay ti pagilian!

Comments are closed.