Footer

Ket naparagsak dagiti ubbing iti gingginget ti bantay

No parigatennaka laeng ti itutulongmo, apay pay laeng nga aramidem? Ngamin, nasamsam-it ti ibungana nangruna no makitam ti nabiag nga isem dagiti pangipaayam iti tulong.

Kasla nakikadua ti init ta naisem ti isisingisingna iti dayta nga agsapa ti Disiembre 2. Daytoy nga aldaw ti natinong ti DZTP Radio Tirad Pass babaen ti suporta ti 50thInfantry Battalion ti Philippine Army ken dagiti pagadalan a Cabanela Early Learning Center ken Bannua-Moran Educational Training Center nga ipapan panagiwaras iti pamaskua a regalo kadagiti ubbing nga agindeg iti tallo a kasulinekan ken kangatuan a lugar iti Ilocos Sur..

Ti kangrunaan a panggep ti grupo: pannakaisayangkat ti napagkaysa a proyekto a pannakaited iti regalo kadagiti ubbing iti sitio Kinbilibil, barangay Daligan, Santa Cruz, Ilocos Sur; sitio Linggaoa, barangay Pidpid ken sitio Kinkoop, barangay Kinmarin, Salcedo, Ilocos Sur.

Agtawen dagitoy nga ubbing iti sangapulo ken nababbaba. Dagitoy pagnaedanda a barangay ti inrekomenda da Sgt. Marcelo Garcia, CMAO ti Philippine Army gapu iti kinarigat ti kasasaad ti panagbiagda.

Naurnong dagitoy a regalo manipud kadagiti dumdumngeg iti Radio DZTP, kadagiti agbasbasa iti Cabanela Early Learning Center ken Banua-Moran Educational Learning Center.

Dimi ninamnama ti rigatmi a simmang-at kadagita a lugar.

Apagbuang pay laeng iti lawag iti dayta a nasapa a bigat ti Sabado, addakamin iti estasion ti radio. Naintaren a naikarton dagiti regalo kas dagiti daan a luplupot, sapsapatos, ay-ayam, noodles, tsokolate ken dadduma pay.

Malaksid dagiti staff ti DZTP nga indauluan ni Station Manager Arlon Serdenia, indauluan met ni 1stLt Dominador Valerio, ti Civil Military Officer for Operation ti 50thInfantry Battalion ti PA a nakabase idiay Guimod Norte, San Juan, Ilocos Sur, dagiti nasurok 20 a soldado. Adda pay ni Madam Effy Cabanela, owner-manager ti Cabanela Early Learning Center, ken dagiti training students ti Banua Training and Educational Center, pagadalan dagiti caregiver services a kukua met ni Bernadeth Anneb, ni Yts Alvarez, maysa a rakista iti Baguio City ken ni Stephen Balanza, mannurat ti Bannawag, ni William Baricawa ti Information office ti Candon City, agraman da Sangguniang Bayan Member Adan Gumangi ti Santa Cruz, ken dagiti barangay officials ti Daligan, Pidpid ken Kinmarin.

Magagaran tunggal maysa a makadanon iti tapaw ti nasulinek a lugar ken kabanbantayan ti sitio Kinbilibil, Linggaoa, ken sitio Kinkoop. Kinapudnona, addan pakpakauna a grupo a nagturong iti Kinbilibil, da Danny Antalan ken Jay-ar Romero, agpada a kameng ti DZTP ket naturogda sadiay. Kaduada ni kagawad Fernando Ramos. Dinanonda sadiay ni kagawad Uyan.

Alas siete iti bigat, nagrubbuat ti grupo iti DZTP. Alas otso met idi nangrugikami a magna iti desdes nga umuli iti umuna a bantay a sang-atenmi.

Nasurok a dua nga oras a sinang-atmi ti desdes a naikunikon iti rangrangkis ken waig manipud iti Barangay Daligan nga agturong iti Kinbilibil. Ditoyen ti naguurnongan dagiti ubbing ken nagannak dagiti lumugar nga aggapu iti Kinbilibil, Linggaoa ken Kinkoop.

Idi damona ket maymaysa pay laeng met a grupo ti sumurok-kumurang 40 a tao a nagkukuyog. Nakakarkarantingda a simmang-at iti umuna a bantay a natupar. Ngem di bumayag, nasayyasayya ti grupo agingga a nagkapat ti grupo.

(Adda tuloyna)