Footer

4 nagudas iti paltog iti Vigan City, Candon City, Bantay

VIGAN CITY – Iti baet a naipakaten ti election gun ban, uppat ti natay iti nagsisina a kaso ti pammaltog iti daytoy a siudad, iti Candon City, ken iti Bantay, Ilocos Sur itay nabiit.

Iti pammapatay ditoy, maysa a polis ti mapapati a nangisayangkat iti krimen a nakapapatayan dagiti agassawa a Dante Villanueva, Sr., 37, ken ti asawana, ni Andrea, 40, agpada nga agnaed iti Barangay 3 ditoy.

Iti inisial nga inbestigasion, mangrabii koman dagiti biktima idi simrek ti suspetsa sana pinaltogan ida.

Naitaray dagiti biktima iti Metro Vigan Cooperative Hospital ngem pimmusayda bayat ti pannakaagasda.

Naammuan a sakbay a natay, mapapati nga innaganan ni Dante ni SPO1 Arnold Aporongao, naasawaan, nakadestino iti 103rd Provincial Police Mobile Group, Bulag, Bantay, ken residente iti Barangay 4 ditoy siudad.

Nakarekobre dagiti inbestigador iti 11 a kapsula manipud iti cal. 9 mm iti nakapasamakan ti krimen.

Boluntario ti suspetsa a simmuko iti provincial headquarters.

Mapapati nga imon ti motibo ti pammapatay.

Iti Candon City, maysa a lalaki ti pinaltogan dagiti di pay am-ammo a lalaki a puon ti nakatayanna a dagus.

Nainaganan ti biktima a ni Dante Gacusan, 37, naasawaan, residente iti Barangay Bagar, Candon.

Segun iti report, mangrabii koma ti biktima idi simrek dagiti suspetsa sada pinalpaltogan.

Sigida a natay ti biktima.

Nakarekobre dagiti polis iti 7 a kapsula manipud iti cal. 45 ken 11 a kapsula manipud iti armalite rifle iti crime scene.

Di pay ammo ti motibo ti pammapatay.

Kabayatanna, napapatay ni Wilson Padron, 35, residente iti Nanerman, Sto. Domingo, Ilocos Sur, bayat ti panangbombana iti pilid ti motorsiklona.

Saan pay a nabigbig ti pimmaltog kenkuana.

Naammuan iti inbestigasion a kagapgapu ti biktima ken maysa a kaduana, ni Maximo Tabuso, iti inuman iti maysa a barangay iti Vigan City.

Dimsaag ni Tabuso iti nagkurusan iti sanguanan ti maysa a battery shop idinto a nagturong ti biktima iti vulcanizing shop tapno bombaanna ti pilid ti luganna.

Madamdama, nagsardeng ti maysa a lugan iti asidegna, dimsaag ti suspetsa sana pinaltogan ti biktima.

Naglibas ti suspetsa nga agturong iti abagatan a direksion.

Comments are closed.