Footer

Kinumpirmaran ni Chavit: agkandidato para senador

VIGAN CITY – Kinumpirmaran ni Gov. Luis “Chavit” Singson nga agkandidato a para senador iti masungad nga eleksion.

Inyendorso ti League of Provinces of the Philippines ni Singson a kandidatoda a para senador bayat ti mitingda idi Enero 12.

Kinuna ni Gov. ti Eastern Samar Ben Evardone a naipamatmatdan ti bilegda a lokal nga opisial ti gobierno iti panangtulongda ken ni Pres. Arroyo bayat ti krisis ti politika ket kayatda nga ipakita a kabaelan dagiti gobernador ken mayor ti agbalin a kingmaker iti panangikampaniada iti eleksion ti kabaddungalanda a para senador.

Kinuna ni Singson a sangsangkamaysa dagiti amin a gobernador iti interamente a Pilipinas a mangibayog kenkuana a kandidatoda para iti Senado tapno adda maasitganda iti nasional para iti kasapulanda.

Kinuna ni Singson a kadakkelan a gandatna iti panagkandidatona a para senador ti panangpapigsa iti probprobinsia, ilin-ili ken barbarangay.

Innayonna a napintas dagiti linteg ngem ti implementasionda ti madi ta “…mapilpili, saan a parehas,” sana inyunay-unay a para iti amin ti linteg: babaknang ken napanglaw, nakapsut ken napigsa.

Nupay kasta, imparipirip ni Singson bayat ti interbiona ken ni Jun Ramos iti DWRS a no adda makita ti liderato a nasaysayaat, agpababa met laeng ket agtaray a para gobernador.

Kinuna ni Singson a mabalin (ngata) ti panagkakaduada iti line-up da nag-Senador Tito Sotto ken nag-Senador Tessie Aquino-Oreta, dua a kritiko ti administrasion ngem nagikkatdan iti oposision ken bimmallasiw iti National People’s Coalition nga idauluan ni Eduardo “Danding” Cojuangco “no irenunsioda ti pammatida ken ni Apo Estrada.”

Ni Singson ti star witness ti prosecution iti impeachment trial ni Estrada.

Maipalagip a nabirngasan ni Aquino-Oreta a “dancing queen” gapu iti panagsalana kalpasan ti panangabak dagiti senador a kakadua ni Estrada a saan a maluktan ti maikadua nga enbelop a mapapati a nakaipalaonan ti bank account ni Estrada iti nagan a Jose Velarde.

Gapu iti daytoy, nag-walk-out dagiti kameng ti oposision ken nagprotesta dagiti umili iti Edsa a nangtunged iti yuulog ni Estrada iti tugawna.

“Nagrigat… no daydiay mangabakda (Sotto ken Oreta), santo resign, resign, kunada iti Presidente,” kinuna ti gobernador.

Nupay kasta, kinuna ni Singson a dependento iti ngato no ania ti madesidir.

Kabayatanna, mapalpaliiw ti pagbaliwan ti pul-oy ti politika iti probinsia iti panagkandidato ni Singson para senador nangruna iti kinagobernador iti probinsia.

Addan dagiti naipalpalapayag a damag a posible a ni Dip. Eric Singson ti tumaray a para gobernador.

Ngem kinuna ni Gov. Singson nga awan pay ti nagpatanganda ken ni Dip. Singson.

Kinunana a paayabanna amin dagiti mayor iti second district tapno pagpatanganda dagiti “agsisimparat  iti ilin-ili.”

Comments are closed.