Footer

Saan a matmatay industria ti tabako – provincial agriculturist

BANTAY, Ilocos Sur – Kinuna ti provincial agriculturist a saan a matmatay nga industria ti tabako no di agtultuloy a kangrunaan a pamastrekan dagiti mannalon ditoy probinsia.

“Saan a matmatay nga industria ti tabako ta kuna pay da Gobernador Luis “Chavit” Singson ken Congressman Eric Singson nga agingga nga adda agmulmula iti tabako, Ilocos Sur will always produce tobacco,” kinuna ni Provincial Agriculturist Teofilo Quintal bayat ti interbio kenkuana ti Tawid News Magasin ken ti DZTP Radio Tirad Pass itay nabiit.

Nupay kasta, inannugot ni Quintal  a bimmassit dagiti nagmula iti tabako gapu ta saandan nga impalubos a mamulaanen iti tabako dagiti salty a taltalon.

“Dayta ti gapuna a kinita ti Department of Agriculture dagiti lugar a napintas a mulaan iti tabako tapno adda kalidadna ti produktotayo,” kinuna ni Quintal.

Inlawlawag ni Quintal a nupay adda kampania iti sangalubongan nga anti-smoking, kasapulan laeng ti pananglukat kadagiti baro a markets idinto a kinunana a dakkel ti demand ti tabako kadagiti pagilian iti ballasiw-taaw.

“Ngem kasapulan nga agpartuattayo iti nakalidad a tabako tapno mabalin dagiti exporttayo a tabako ti makikumpetensia kadagiti sabsabali a pagilian,” kinuna ti provincial agriculturist.

“Babaen iti daytoy a wagas, ag-survive ti tobacco industry, ket agtultuloy a sagrapen dagiti probinsia nga agmulmula iti tobacco a pakaibilangan ti Ilocos Sur ti benepisio nga aggapu iti R.A. 7171,” kinuna ni Quintal.

Comments are closed.