Footer

2 natay, 1 nasugatan iti pammaltog

SAN JUAN, Ilocos Sur – Dua a lalaki ti natay idinto a grabe a nasugatan ti maysa iti nagsisina nga insidente ti pammaltog iti probinsia itay nabiit.

Natay da Herminio Viloria, 49, baro, trabahador, residente iti Barangay Saoang, ken Christopher Paraligan, 25, baro, residente iti Brgy. San Jose, Vigan City idinto a grabe ti sugat ni Anthony Hermoso, 26, baro, mannalon, residente iti Bandril, Nagbukel, Ilocos Sur gapu iti pannakapaltogda.

Iti pammaltog iti San Juan, madama nga agiinom ti biktima ken sumagmamano a kakaduana iti pagtaengan ni Jessie Cruz idi immasideg ti suspetsa sana pinaltogan ni Viloria iti namindua.

Simrek ti bala iti teltel ti biktima sa rimmuar iti kannigid a rupana a puon ti ipapatayna a sigida.

Dua a kapsula manipud iti M-16 armalite ti nasarakan dagiti nagresponde a polis iti nakapasamakan ti krimen.

Iti pannakaisurat daytoy, napaayaban dagiti kinainninom ti biktima tapno mapagsaludsodanda maipanggep iti pammaltog.

Iti Vigan City, naideklara nga awanen ti biag ni Paraligan idi maidanon iti Gabriela Silang General Hospital.

Segun iti inbestigasion, simmangpet ti biktima a nakainom ket nagprobokar a nakaigapuan ti panangpaltog kenkuana ti kabsatna a managan Jester, baro, agnaed met laeng iti Barangay San Jose.

Nakadetene iti police station ti suspetsa.

Kabayatanna, naiyospital ni Hermoso gapu iti sugatna iti rusok kalpasan ti panangpaltog kenkuana ni Gene Fermin, 48, naasawaan, kalugaran ti biktima.

Segun iti report, agiinom ti biktima, ti suspetsa ken sumagmamano a kabagianda idi mapapati a pinaltogan lattan ni Fermin ni Hermoso nga awan gapuna babaen iti Gauge 12 shotgun.

Simmuko ti suspetsa iti polis kalpasan ti pammaltog.

Comments are closed.