Footer

Addatayo iti nagkurusan ti politika

DAYTOY nga eleksion ti agbalin a reperendum ni Pres. Gloria Macapagal-Arroyo, ti pakatingitingan iti pulso dagiti umili iti turayna a napulapolan kadagiti kontrobersia.

Iti itatapog ti panawen ti kampania, saan a mainsasaan a surotento latta dagiti kandidato ti administrasion ti al-alia ti Hello Garci tapes ken ti mapapati a pannakaaramat dagiti pundo ti turay para iti kandidatura ni Pres. Arroyo idi 2004.

Nupay sangkadagullit ti Malakaniang a naikupinen dagitoy a kontrobersia, kuna ti Catholic Bishops Conference of Philippines a saan pay a naresolbar ti “Hello Garci” scandal a nangibulgar iti mapapati a panagsuitik iti dayta nga eleksion.

Iti biang ti CBCP ken nadumaduma a sektor, kasapulan a natalna, naurnos ken nadalus daytoy masungad nga eleksion tapno saan a manayonan ti “sosial a panagduadua ken kaawan gaway” no rumsua manen dagiti panagsuitik a mangpandag iti pagayatan dagiti umili.

Kas kuna ni CBCP Pres. Angel Lagdameo iti suratna a pastoral, “gapu kadagiti di naresolbar a saludsod mainaig iti eleksion idi 2004 a pinarnuay ti eskandalo ti “Hello Garci”, rimsua dagiti agdama a problema politikal a nangtubeng iti nadardaras a panagdur-as ti ekonomia ken hustisia sosial, nangnangruna kadagiti marigrigat.

Napateg ngarud daytoy midterm elections ta agpaay a reperendum ken ni Pres. Arroyo tapno maikupinen dagiti problema ti pagilian a pinarnuay dagiti kontrobersia a nanggunggon iti pundasion ti gobierno.

Iti biang ti Simbaan, no mangabak dagiti kandidato ti administrasion, kayatna a sawen inawaten dagiti umili ti palawag ni Pres. Arroyo. Iti sabali a bangir, no mangabak ti oposision, saan a namati dagiti umili iti Presidente.

Makuna ngarud nga aramiden amin ti agsumbangir amin a pamuspusan ken kabaelanda tapno mangabak dagiti kandidatoda. Ti dakkel a problema no gun-odenda ti balligi iti dakes a wagas, kas iti naipanurok a panagsuitik iti eleksion.

Kasapulan ngarud ti napingpinget a panagsiput ken panagtitinnulong ti amin tapno nadalus, natalna ken naurnos ti maangay nga eleksion, iti kasta, maragpat ti pagayatan dagiti umili – ti pannakaipuesto dagiti dadaulo a pudpudno a mangisakit iti pagimbagan dagiti umili, saan a ti managimbubukod nga interes ti partido wenno iti maysa wenno sumagmamano laeng a tattao.

Iti masungad a Mayo 2007, magtengtayon ti nagkurusan, a no nagbidduttayo iti surotentayo a dalan, posible a gungugong ti itay pakaiderraasan wenno nasaysayaat a masakbayan.

Adda iti dakulaptayo no ania ti pilientayo a dalanen.