Footer

Ammoda ta ad-adut’ nainumda

UMAPAL ni Brandon kadagiti kabaddungalanna a tinedier ta dida maparparitan iti panagballogda. Kayatna ti sumurot kadakuada ngem saan a palubosan dagiti dadakkelna. Nainget dagiti dadakkelna.   Linteg ti saoda a dina mabalin a balusingsingen.

“Saandaka  nga isuro iti pakaisagmakam. Ti ar-aramidemmi ket saanmonto a pagbabaywan iti masakbayan!” iperreng no kua ni Mang Terio nga amana a maysa a mangngalap.

“No dimo kayat ti agrigat a kas kadakami a nagannak kenka, tungpalem dagiti ibalbalakadmi kenka,” isaruno met no kua ti inana.

Dagiti met laeng makalapan ni Mang Terio iti isursor ti inana kadagiti kabalbalayan wenno ilakona iti tiendaan.

“Unaem pay ti panagiskuelam. No makaturposka, ket maaddaanka iti trabahom, nawayakanton  iti kayatmo nga aramiden. Ngem kadagitoy a gundaway, dimo ipapilit ti kayatmo!” kinuna pay ti amana.

Isu laeng ti saan a maisursurot kadagiti kapatadanna nga agballog wenno mapan kadagiti nadumaduma a gimmick dagiti agtutubo. Isu  laeng ti saan pay a nakaraman iti sigarilio wenno  simmimsim iti nasanger.

“Dikam pay agsigarilio, anianto la ketdi kenkuanan! No makitak, makaraman la ketdi iti dina pay naramanan!” kuna ti amana iti naminsan a pannakitungtong daytoy ken ni Mang Jose a kaarrubada.

Pagtutungtonganda dagiti agtutubo iti agdama. Manmanonsan ti saan nga agsigarilio nga agtutubo. Uminumda payen iti nasanger. Agaremen dagiti dadduma. Dagiti met dadduma, adik iti kompiuteran.

Ngem saan a mabalin daytoy nga aramid kadagiti dadakkelna. Kasta met dagiti kakabsatna a dua a babbai. Ni Brandon iti inaunaan.

Addan iti  maikapat a tukad ti sekundaria. Tumarektek metten, siempre. Seknan metten ti infatuation wenno crush a gagangay kadagiti agtutubo.

“Unaem pay ti panagiskuelam. Agpadakami ken amam a di  nakaturpos iti sekundaria, isu a dimi kayat a maituladka  kadakami nga agrigrigat. Uray kaskasano, ikaradapmi ti panagiskuelayo  nga agkakabsat. Awan ti sabali  nga  arapaapmi no di laeng ti pannakakitami ti panagturposyo iti kolehio. Awan ti sanikuami a mabalin nga  ipatawidmi kadakayo. Isu a bay-am pay laeng dayta arem-arem!” patigmaan ti inana.

Nasakit ti nakem ni Brandon. Kasla  kayatna ti agrebelde kadagiti dadakkelna. Kasla saan a nawaya ti panagriknana. Apayen a paritandak iti  kayatko a mapasamak? dayta ti linaon ti panunotna. Ngem dina kabaelan a dupiren ti bileg dagiti dadakkelna.

Inggaedna ketdi ti nagiskuela. Agingga a nakaturpos iti kolehio. Idi agpakada a mapan mangged idiay ballasiw taaw, saan a nagkedked dagiti dadakkelna. Lima a tawenna iti Saudi Arabia. Inrantana ti di nagawid iti mabayag. Nagurnong.

Iti panagawidna, naduktalanna laengen a saan a nakaadal dagiti kinaubinganna idi a nawaya ti kayatda a mapasamak ti biagda idi agtutuboda pay. Adda  nasapa a nagasawa,   nagbalin a makikalkalap, estambay. Kaadduanna ti sarangusong ken parikut ti gimong.

Adda kaayan-ayat ni Brando a katrabahuanna idiay Saudi. Saanna nga imbagbaga daytoy kadagiti dadakkelna.

Kayatnan nga agsimpada. Kinagiddanna a nagawid.

Kinasaritana dagiti dadakkelna.

“Idi nagturposka iti kolehio, nawayakan kadagiti amin a pagayatam a mapasamak. Sikan ti agikeddeng tii kayatmo a mapasamak. Awan ti saan kadakami basta la ketdi saanka a maisagmak,”  kuna dagiti dadakkelna.

Nagyaman unay ni Brandon.

No dadduma, saan a patien dagiti agtutubo dagiti dadakkelda. Lalo itoy a panawen a nagkaadu ti impluensia kadakuada ti gimong. Ngem kadagiti sumurot ken agtungpal iti balakad dagiti dadakkelda, isuda ti agballigi iti biag. Dayta a panagballigida ti isurodanto met kadagiti annakda.

Adu ti ammo dagiti dadakkel ta  naglabasandan dayta a panagbiag. Ad-adu ti danum a nainumda isu nga adu ti ammoda. #