Footer

Insentibo dagiti barangay officials, saan a pangpolitika: VM Franz Ranches

VIGAN CITY – Kiniddaw ni Bise Mayor Franz Ranches nga ikkaten dagiti kritiko ti reserbasionda mainaig iti performance monitoring board a mang-evaluate iti panagtrabaho dagiti barangay officials ken tanod ditoy siudad no maikarida met laeng a maikkan iti binulan nga insentibo.

“Ikkatentayo koma daydiay a mindset wenno kapanunotan,” kinuna ni Ranches idinto nga inyunay-unaynana nga “ipapantayo (koma) nga agtrabaho a talaga ti monitoring board para iti pagsayaatan dagiti opisial ti barangay maibasar kadagiti pagbatayan ken panagtrabahoda.”

Sagudayen ti nasao nga ordinansa a maikkan dagiti “deserving” barangay officials ken tanod iti monthly performance incentive nga agdagup iti P5,500.

Kas insentibo iti nasayaat a panagtrabahoda, maikkan iti binulan ti barangay captain iti P1,500, P3,000 ti pagbibingayan dagiti barangay kagawad, SK Chairman, tesorero ken sekretario ti barangay ken P1,000 para kadagiti barangay tanod.

Nupay kasta, nabuangay ti monitoring board a mangkita iti performance dagiti barangay officials no maikarida met laeng a maikkan iti nasao nga insentibo.

Simngay ti reserbasion iti nasao a monitoring board agsipud ta idauluan daytoy ti mayor, kas chairman, ti bise mayor, kas vice chairman, idinto a kamkameng ti pannakabagi ti Department of Interior and Local Government, coordinator ti city development office, representative ti graduate school ti University of Northern Philippines, ken dua a non-government organization a pakairamanan ti religious sector ti parish pastoral council ken Vigan City Press Corps.

Naidukit pay bayat ti programa a “Ti Konseho ti Vigan” a posible a maaramat laeng ti monitorng board a pangpastidiar kadagiti komonkontra a barangay officials, nangruna dagiti kameng ti oposision.

Inannugot ni Ranches nga adda rimmuar a kasta a “haka-haka” ngem kinunana a kayatda nga ipaneknek a nagbiddut dagiti kritiko mainaig iti monitoring board.

“In the first place, apay koma a mangaramid ti city government iti performance incentives no ipaidamna met laeng wenno alaenna (daydiay) a gundaway nga ipiten wenno pastidiaren ti maysa a barangay official?” kinuna ni Ranches.

Kinuna ni Ranches a panggep ti barangay incentives ti mang-encourage ken mang-challenge kadagiti barangay officials nga agtrabaho a nasayaat idinto nga impaganetgetna nga ikkan koma ti ordinansa iti gundaway a maimplementar.

“Awan ti pagdanagan, … pagbutngan dagiti barangay officials, basta la ketdi agtrabahoda,” kinuna ni Ranches.

Inkalintegan ni Ranches a kasapulan ti monitoring board agsipud ta “saan met (ngamin) nga ordinario wenno regular nga allowance a mandatory no di incentive a maibasar iti performance ti maysa a barangay official” “…ket agsipud ta city government ti paggapuan ti pundo, natural laeng nga adda monitoring board ket ti mayor ti mangidaulo agsipud ta daytoy ti chief executive.”

Kinuna ni Ranches nga inisiatibo ni Mayor Medina ti pannakaited ti insentibo kadagiti barangay officials ket “ikkatentayo koma ti presumption, ‘haka-haka’, kapanunotan a daytoy ket pangpolitika, a saan a maikkan dagidiay saan a kakadua iti politika.”

“Nasapa pay nga ibaga dayta ta iti agdama, awan pay ti nagipila iti kandidaturana,” kinuna ni Ranches.

Naaprobaran ti nasao nga ordinansa iti second reading ket pormal a mabutosan iti sumuno a session santo maidatag ken ni Mayor Medina para iti pannakapapirmana.”

Comments are closed.